《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2019年10月14日
由反修例風波所引發嘅社會運動已持續超過4個月，對香港經濟影響逐步浮現，尤其零售業更受重擊，睇番8月份曾有超過800名從事百貨及零售嘅從業員接受訪問，大部分都提到其工作嘅店舖，銷售額下跌三至七成以上不等，而零售管理協會8月份零售業金額整體跌幅約23%，係有史以來最慘痛。
零售管理協會主席謝邱安儀就曾經喺一個電台節目時提到，有私人商舖業主願意減租一成至最多三成，為期2至3個月，不過大部分嘅大型商場都企硬唔肯減租，包括領展（00823）及港鐵（00066）。
阿Man從一眾從事零售生意嘅老友口中得悉，所謂業主肯減租嘅真係寥寥無幾，仲要減幅去到三成？老友話聞所未聞，能獲減租一成已經係福分。
就以老友喺銅鑼灣兩間咖啡店為例，兩個商場都屬於同一大地主，自從8月份開始，因為銅鑼灣多次示威活動，商場都要提早關門，甚至去到9月份更試過全日停業。老友話業主都算係咁，曾對8月多次提早關閉商場，向佢兩個店舖作出賠償，不過金額呢方面只可以話係一種心意，叫做好過無。經過阿Man幾番追問下，老友終於講咗賠償額大約唔到租金十分一，佢話都好感恩，事關同區內其他商舖租戶係賠都冇得賠。
至於租金減免方面，佢話業主已主動提出暫時減租5%，為期3個月視乎情況再作通知。老友嘅咖啡店位於主要示威區，呢幾個月嘅生意額跌咗超過五成，再加埋由10月開始，港鐵停駛或提早停止服務，預期呢個月嘅生意額更加慘不忍睹，減5%嘅租金幫到幾多，真係要講句「多謝晒，有心」。
小恩小惠或袖手旁觀
呢一個老友已經算好彩，阿Man另一個老友係經營手機及手機設備買賣嘅，3個舖分別位於旺角及太子，聽到呢兩個地區都知幾大鑊，由於3店分別屬於不同私人業主，並唔係大財團商場旗下租戶，情況未如零售管理協會所講，私人業主願意減租，反而係一個崩都唔肯減，對於租客係零支援。業主更表示，開唔開門做生意，係租戶你自己個人決定，與業主無關。
老友無奈表示，位於示威區嘅地舖，其實喺社會運動初期，多次示威活動仍然打開門口做生意，但每當防暴警察出現，放晒催淚彈嘅情況下，根本就無可能繼續營業，業主嘅涼薄可見一斑。
咁樓上舖情況又如何？阿Man勝在朋友多，另一個朋友喺觀塘工業區嘅工廈經營傢俬舖，莫講話無減租呢支歌仔唱，唔加租都已偷笑，交遲一日租都追到甩褲。
上述幾個情況反映咗一件事，大業主又好，私人業主也好，喺目前零售業水深火熱嘅情況下，對於租戶頂多都係小恩小惠，甚至袖手旁觀，未有真正作出支援，而政府為大股東嘅港鐵旗下商場，若能以身作則，帶頭減免旗下租戶租金，或能起一定先導作用，鼓勵其他業主減租跟租戶共渡時艱。
麥狄文（徐狄怡．證監會持牌人）
訂戶登入
| 下一篇： | 徵收數碼稅大勢所趨 |
| 上一篇： | 新規出台 借殼成本增加 |
