《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2019年8月26日
長實（01113）上周宣布以27億英鎊收購英國啤酒餐飲集團Greene King，呢個收購畀人第一個印象當然有啲九唔搭八，無啦啦搞地產為主嘅長實，點解會走去米字旗國買啤酒餐飲集團，但只要細心睇睇收購通告就知，Greene King係米字旗國最大嘅酒吧（Pub）營運集團，1799年創立，旗下有1687間自營嘅Pub和餐廳，1043間特許經營酒吧及兩間啤酒廠。Greene King在倫敦證交所上市，亦是富時250指數成分股之一。2018該集團收入22.17億英鎊，稅前利潤4.82億英鎊，惟啤酒只佔集團10%收入。
長實是次收購，只是維持其地產佬本色，完全未有出軌，因為長實睇中嘅係Greene King擁有約7000萬平方呎土地，根據最新估值，呢批土地市價約45億英鎊，遠比其賬面值高出10億英鎊，亦遠高於長實今次收購價27億英鎊。
寶藏不是啤酒是地皮
說穿了，長實係睇中Greene King嘅地皮，米字旗國距離脫歐只有個幾月，當市場對米字旗國前景感到疑惑，看不通，摸不透之際，長實喺當地作出一項超過200億港元的投資，雖然對於長實整個集團嚟講，呢個數目係濕濕碎，但呢項收購卻為投資者提供咗一啲貼士。
超人去年正式退休，由長子Victor接手，貴為集團顧問，當然秉承超人嘅理念去經營。自2013年起，長實出售上海陸家嘴項目，或分拆港燈等舉動，甚至多次有傳聞計劃出售百佳、屈臣氏等，都令人猜測長和系部署從香港及內地撤資。超人當時一再否認，強調「我的家在香港，長和系的基地在香港，永遠不會離開香港」，但繼出售內地資產後，長和系確切地把業務重心轉移，2015年長和系宣布重組，新公司則於開曼群島註冊。
由於過往超人一見大動作，其後金融市場必有大事發生，例如1987年大供股，不久便出現股災；1997年進行大重組後，亞洲金融風暴便來臨，所以當年長和系重組，市場也有不少揣測。結果幾年過去，至去年中美才爆發貿易戰，香港嘅股樓未見大受打擊，反而零售業每況愈下，至兩個幾月前社會運動爆發，更令本港零售業雪上加霜。
睇番轉頭，超人自2013年起大幅減少在中港投資，甚至出售資產，除了經濟原因，有人認為可能係基於政治因素考慮。政局唔易睇透，倒不如早啲作準備，將業務重心轉移，總好過承受不必要的風險。
脫歐前落注 英後市值留意
當然，一般土生土長嘅香港人，主要資產都係自置物業，以及現金股票等，若然要跟足超人步伐，把唯一物業賣出根本唔多可能。事實上，長實喺內地嘅土儲在2016年至2018年間跌近23%，香港則下滑33%，但呢幾年之間中港兩地樓價地價漲幅有目共睹，在供不應求嘅情況下，本港樓價或難出現如1997年至2003年期間嘅崩盤式下跌。長實今次在米字旗國脫歐前，作出變相大規模的土地投資，看來是對該國前景投下信心一票，喺10月米字旗國正式脫歐後，不妨留意英鎊及當地樓價走勢，或者係危中有機，超人智慧仍不能忽視。
麥狄文（徐狄怡．證監會持牌人）
訂戶登入
| 下一篇： | 網絡設使用權限防內鬼 |
| 上一篇： | 揭破國企出貨秘技 |
