2019年8月12日
高仁與「豬朋狗友」早前討論過,一名獨立非執行董事(Independent Non Executive Director, INED)忽然正義上身,推翻上市公司執行董事的決定,有可能是暗藏內情。高仁與「豬朋狗友」之後繼續「吹水」,談到公司董事請辭理由多的是,有可能編輯成金句精華錄。
高 仁: 各位「巴打」仲記唔記得,3年前四大天王之一的黎天王,舉行戶外演唱會出現小風波,不但一力承擔責任兼且真誠道歉,真係令到香港人好「滾動」(感動)。
戴孤劃: (用普「東」話,即普通話+廣東話)這件事情當然記得,我還記得的是Leon的經典金句,什麼「核心嘅外圍係核心嘅內圍」。
施友化: 如果當年有去外圍聽免費歌嘅話,大家應該會覺得Leon好似有預測能力咁,佢嘅金句真係好有玄機!
高 仁: 講到金句,上市公司董事請辭理由數之不盡,有一些原因卻是model answers,有可能編輯成一本金句錄。
戴孤劃: 沒錯。如果老董年紀大、身體壞的話,他們都會以個人年齡或健康作為請辭的原因。
施友化: 如果董事正值黃金歲月嘅壯年,搵工「跳槽」轉工係相當平常嘅事,佢哋辭任上市公司董事一職嘅原因,主要就係謀求其個人職業發展或其他業務安排及事務。
高 仁: 至於「愛回家」或者「公職王」嘅董事,佢哋會話希望投放更多時間喺家庭及其他個人事務,或者決定投入更多時間及精力至其他承擔及事務。
施友化: 我哋以上所講都係董事辭職嘅基本金句,該名董事同董事會並無出現意見分歧,亦無其他須提請股東注意嘅事項,大家只係和平「分手」嘅。
戴孤劃: 換言之,董事也可能是不歡而散地請辭?
施友化: 係呀。例如,有一家上市公司全數3名INEDs(Independent Non Executive Directors,獨立非執行董事),就以無法履行作為INEDs職責向審核師提供資料進行獨立審查、公司管理層冇採取積極措施去遵守其文件及資料要求、亦冇提供足夠資金去支付與獨立審查有關嘅專業費用等原因,決定一齊「劈炮」辭去INEDs嘅職務。
炒人劈炮 通告露玄機
高 仁: 照咁睇,呢家上市公司可能有財務缺失等問題,INEDs喺通告中申述上述辭職理由,可能係想變成一項免責聲明。
戴孤劃: 除此之外,有沒有董事會因不滿執行董事,繼而免除其職務的案例?
施友化: 上市公司炒執董當然亦需要有原因,譬如可以話,董事會認為該名執董的管理方式同觀念,與其他董事會成員存在顯著分歧,且商業理念與公司業務發展不一致,建議應免除其職務及將其資源用於復興公司業務。
高 仁: 上市公司炒一名董事職務慳返嘅錢,講到可以用嚟復興公司業務,呢啲咪係炒人又不失優雅嘅藝術囉。哈哈!
戴孤劃: 好句子,好句子!咱的公司也要學習、學習一下!
施友化: 除咗上市公司之外,原來證監會喺IPO造假案件中,唔止會調查保薦人盡職審查缺失,即使IPO公司最終自行撤回上市申請,公司董事亦需要為申請文件中嘅虛假或誤導訊息負上責任。
戴孤劃: (用普「東」話,即普通話+廣東話)若果上市不成功,獨董酬金一定收不到,還要為虛假或誤導訊息負責,真係慘慘豬。
本欄逢周一刊出。
如想與高仁交流上市公司的財技個案及招數,請電郵至[email protected]。
放大圖片 / 顯示原圖
訂戶登入
下一篇: | 沽空機構具另類存在價值 |
上一篇: | 黃金勢盛 短期超買 |