2019年8月9日
美股前晚有驚無險,港股昨日趁勢反彈,恒指最多升過318點,至26317點,收市報26120點,升123點。技術上恒指已反彈7月4日以來跌幅的0.236倍(26249點),下一目標是0.382倍,即26776點,該處位於周一的大型下跌裂口區(26502至26868點)內,阻力甚大。
美股前晚早段嚇驚人,道指一瀉就接近600點,點知收市只跌22點;標指納指仲要倒升,咁快跌完?美股最近一波跌勢,起因主要兩個,一是中美貿易戰可能擴至貨幣戰;二是多家央行爭相減息,美債孳息大跌,而且又出現倒掛,投資者擔心環球經濟。現在看不到這兩個因素有根本變化,對美股後市未敢太樂觀。
除了這兩個不利因素,港股仲要面對多兩項:人民幣貶值及本地社會衝突。人民幣中間價昨日再貶43點子,報7.0039,為11年來首次「破七」,幸好離岸價先低後高,算係喘穩,港股亦得以反彈。不過人民幣後市都係跌多過升,本地社會衝突更係唔知點收科,短期港股都係彈散市居多。
金價繼續升,紐約期金每盎斯收報1519.6美元,升2.4%,6年來首次企於千五關樓上收市,急升後短期或有調整,但中長線仲係睇好。新債王岡拉克一直睇好金價,佢話負利率的債券愈來愈多,美債遲早會負利率,而股市已陷入熊市,投資者只好買金。筆者早前補回第一注金礦股,等緊機會補第二注。
若美股企穩,港股技術上仲有機會彈高多少,但博反彈係高難度動作,筆者唔打算參與。股友若鍾意刺激博一博,可考慮中聯重科(01157)。
上次推介中聯重科係7月上旬,其後升得幾好,近日股價隨大市由5.8元高位下跌,周二最低跌至4.6元,回到上次推介時價位,又貼住保歷加通道底,應有支持。中聯早前發盈喜,預計淨利潤24億至27億人民幣,按年增長1.72倍至2.12倍。內地重型貨車之強制性排放標準要於2020年底前升級,預計公司下半年續有佳績,博反彈目標放在5.2元。
放大圖片 / 顯示原圖
訂戶登入