熱門:

2019年7月22日

麥狄文 金融街密語

中資投行打工有潛規則?

中資投行喺近10年於本港金融市場發展之快,以及於市場擔當嘅角色有幾重要,相信走一轉落中環,都聽見操普通話嘅港漂,已可反映過往由外資主導嘅金融市場,早已被中資取得發球權。上星期阿Man擔任一個關於9號牌照搵食攻略嘅清談節目嘉賓,就有網民問到有關喺中資行打工,以及外資行打工嘅分別。

一般嚟講,外資行注重嘅係員工辧事能力,一切講求result oriented,只要員工有實力,一定有機會發圍。上司要求下屬積極付出,多勞多得,總之回報係跟業績掛鈎,仕途如何就要睇你幫公司搵到幾多錢。而外資行亦唔會講乜嘢人情味,做錯嘢又或者公司要縮皮,話炒就炒完全無情講。至於中資呢,就關係至上,首先要有好嘅人際關係,能夠氹得上級開開心心,自然能平步青雲,上司亦唔要求下屬進取辧事,少做少錯,總之就咪搞咁多要令上級孭鑊,妥妥當當交到功課,額外嘢就咪搞咁多。

公司上下一片紅海

而入得中資行打工,就知管理層嘅幾乎九成係內地專才,由內地總公司派嚟香港做舵手揸fit人,而近年就連junior都主要招攬內地嚟香港讀書嘅畢業生或港漂,總之公司上下搵錢嘅部門,都係一片紅海,本地畢業生要躋身其中,生存實在唔容易。

早前更有某中資行爆出性醜聞,定息收入部門上司下屬爆桃色花生,某女員工跟上司相約酒店聚會,而女主角係瑜伽高手,暗示鹹濕上司有特別性癖好。由於桃色花生女主角喺短時間內升職坐火箭,令唔少中環人暗嘆打中資工嘅女職員,係咪要透過性交易換取前途!

查實喺幾年前,已經有傳聞中資券商慘變色慾證券行,當時缸湖傳聞有中資投行高層向女下屬「約炮」,女下屬拒絕後慘遭報復,包括無故被扣減花紅,無理降低其工作評核級,及後更暗示該名女下屬曾參加性愛派對,最終該名女員工更被炒魷魚。女員工不忿被性騷擾及欺凌,透過法律途徑要求對方賠償道歉,其後被告提早收山退休,雙方最終庭外和解。

桃色花生不限金融圈

阿Man唔敢講話呢啲係中資行嘅潛規則,不過聽過口痕友講,喺中資行裏頭要生存,女嘅要瞓底(暗示性交易),男嘅要跪低(暗示擦鞋仔),先有機會發圍上位。至慘嘅係通常有啲咁嘅醜聞爆出,公司十居其九唔會追究男高層,事關都係自己人,甚至更有傳聞高層玩「共享」,又點會怪責同道中人?

好老實,又唔係只得金融圈至有呢啲桃色花生,亦唔係中資企業先會有性騷擾及性醜聞,喺任何一個行業同任何資金嘅企業都有可能發生。

其實,打工生存之道,首先都係要做好自己。所謂東家唔打打西家,若然覺得融入唔到公司文化,大可另謀高就,山不轉路轉,路不轉人轉,人不轉心轉,總有出路可見青雲天。

麥狄文(徐狄怡.證監會持牌人、滙盈資產管理.董事總經理)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads