2019年6月24日
香港近日發生嘅事件,暫時仍然未得到圓滿解決,但就引證咗一樣嘢,喺無事無幹嘅時候,無嗰樣整嗰樣,行錯一步可以搞到好大鑊。家陣呢隻鑊又未有人肯孭,亦未知點收科,希望各界人士引以為鑑,有啲事急唔嚟,唔應該做嘅時候,就千祈唔好夾硬嚟。
內地經驗 愈停愈心慌
咁啱,香港證監會首次喺年報中明確披露,正與香港交易所(00388)研究係咪要喺市場引入「熔斷機制」(Circuit Breaker),港交所將在適當時候展開公眾諮詢。市場上早有消息,港交所正初步向業界收集有關「熔斷機制」嘅意見,即係當香港出現重大危機,如恒生指數顯著下跌某個百分比,例如一日內跌超過兩成,係咪需要採用相關機制暫停交易,以免當其他主要市場均有停市機制,而港股不設類似機制,會淪為外資及大鱷提款機。睇番亞太區主要股市當中,香港及澳洲等沒有「熔斷機制」,若其他主要市場在極端波動情況下「停市」,只有香港繼續「開市」,很有可能成為「大鱷點心」。
當然,港交所向業界作非正式諮詢,主要係先摸一摸底,唔代表港股即將出現危機,主要係防患於未然,但最近因為「反送中」引發一連串社會矛盾和衝突,難免令人有其他聯想。目前,港交所只實施適用於個別股份的市調機制(VCM),即恒指及國指成分股於5分鐘內價格上漲或下跌10%,便要進入5分鐘「冷靜期」。據悉,港交所正探討是否有需要擴大至覆蓋整個市場,以防範系統性風險,同時給予市場更多時間冷靜。
內地A股喺2016年1月曾短暫實施熔斷機制,即以滬深300指數為基準,若漲跌幅超過5%及7%,便要分別暫停交易15分鐘及全日停市,但推行短短4日,已經因多次停市造成混亂而被取消。內地熔斷機制好明顯係一個失敗例子,阿Man同唔少內地基金操盤員交流過意見,發現呢個設計非但未能讓投資者真正冷靜,相反,冷靜期會加劇股指跌幅同跌速,搞到投資者愈停愈心慌。
至於港股喺1987年環球股災之際,亦曾停市3天,本欲給予投資者一個冷靜期,豈料又係愈停愈大鑊。究竟「87股災」發生咗乜事,有大把紀錄可以翻查,阿Man唔再多着墨。
市場成熟 避險方法多
其實,喺香港實施熔斷機制意義唔大。港股係一個相對成熟嘅市場,活躍於港股嘅一般投資者與機構投資者,基本上都能夠理性看待及處理股市起跌。其次,港股目前有多種唔同嘅投資產品和工具,可進行對沖操作,即使股市出現一定程度嘅跌幅,投資者可透過沽空對沖下跌風險,跟內地A股市場大不同。至於個股方面,港股一直以嚟都不設升跌幅限制,個股單日升跌逾五成,甚至七八成嘅情況,投資者習以為常,完全識得點去面對並處理。
由於港股、A股嘅發展步伐及成熟程度有甚大分別,所採取嘅機制、營運同監管手法,自然唔一樣。由衷希望證監會同港交所,唔好求其做吓樣整個所謂諮詢,把唔啱使嘅機制強加於港股,危害市場發展兼作繭自縛。
麥狄文(徐狄怡.證監會持牌人 滙盈資產管理.董事總經理)
放大圖片 / 顯示原圖
訂戶登入
下一篇: | 大數據助徵稅機關堵稅網缺漏 |
上一篇: | 獨董王翻盤有內情 |