Long Call三桶油博刀仔鋸大樹

港股昨天反覆，恒指早市升過171點，可惜再一次欲彈無力，午後一度倒跌17點，收市報27705點，僅升48點。恒指10天線（28162點）跌破100天線（28249點），壓力愈來愈大。

侵侵對中國施加的壓力也愈來愈重，繼趕絕華為後，據報正考慮把5家中國企業列入黑名單，禁止這些企業取得美國零件和軟件，受影響的公司可能包括監控產品一哥海康威視。

表面睇侵侵氣勢如虹，係咪外強中乾佢自己至知。今年有份投票議息的波士頓聯儲銀行主席羅森格倫日前表示，貿易戰是目前顯而易見的下行風險，也是聯儲局要保持耐心的重要原因之一，若持久地執行高關稅導致通脹上行，就「可能觸發儲局以貨幣政策回應」。

侵侵一直逼儲局減息，甚至重啟QE，因為佢知道以巨額財赤支持的經濟唔撐得幾耐。但照羅森格倫所言，貿戰若令通脹重臨，就好難減息，唔加息已經偷笑。

美國伊朗局勢關鍵

大摩剛發表報告，指伊朗與委內瑞拉石油產量下降、產油國利比亞內部軍事衝突持續，以及油組核心國家執行減產協議，將令石油供應緊張，預計第二季油市供應缺口為每日60萬桶，第三季缺口擴大至每日110萬桶，下半年布蘭特原油將升至每桶75至80美元，即係大約有4.5至11%潛在升幅。

貿易戰拖累環球經濟，本應不利油價，但除了油組減產之外，美國搞亂委內瑞拉及禁止伊朗石油出口，均有助油價企硬，大摩報告實有其道理。目前其中一大變數係伊朗對美國的制裁作何反應，若伊朗威脅封鎖霍爾木茲海峽以截斷中東原油供應，油價的潛在升幅豈止一成。當然，若伊朗封鎖海峽，美國很可能動武，惟今次好難爭取到國際支持，若戰況唔係一面倒閃電完成，油價可漲更高。

因此三桶油有留意價值，市況難料，買正股投入資金較多，風險也較大，不妨輕注Long入三桶油的遠期Call，博刀仔鋸大樹；三者取其一，當然揀中海油（00883）。