2019年5月10日
中美新一輪貿易談判前夕,大市再現暴瀉,恒指昨日收市報28311點,插水692點,跌幅達2.39%。美國會否對2000億美元中國貨加徵25%關稅,今日中午便知曉,投資者沽貨減磅係理性選擇,不過如果等到昨日至沽,未免稍遲。
中國副總理劉鶴今次訪美進行談判,頗有赴鴻門宴的味道。會前雙方口頭上毫無退讓之意,中國官媒《環球時報》指美國很想達成協議,鴻門宴嚇唬不住中國;商務部亦表明,美國若提高關稅,中方必會採取反制措施。
美國總統特朗普就話急於達成協議的是中國,又暗示美國唔急,佢「好高興每年國庫多收1000億美元關稅」。不過「侵侵」此話頗有問題,正如前澳洲總理、「中國通」陸克文指出,劉鶴今次不掛習大大特使頭銜,而且談判代表團規模縮小,表明北京「並不急於與美國達成協議,亦不準備放棄任何東西」。至於1000億美元關稅收入,其實大部分由美國消費者支付,「侵侵」根本搵國民老襯。
造淡並非絕無風險
雖然談判前景看似好灰暗,但政治一日百變,唔可以睇得咁死。大家應該仲記得一個星期前,「侵侵」仲話好快舉行習特會,點知今次就幾乎反枱。現在雙方雖然劍拔弩張,話唔定下個星期又拍住膊頭,雖然機會唔大,但唔等於零,所以造淡唔係絕無風險。
近期Long Put港交所(00388)、債重內房、內銀同內地券商的股票期權,呢兩日都沽咗三分之二,剩低三分之一已無成本,沒有心理壓力,一於揸住等佢飄。不過現在才追沽,先機已失,唔係話冇錢贏,只是風險同回報唔啱數。
強勢股往往在跌市後期才插水,早前大強勢的內地消費股,近日亦開始腳軟,蒙牛(02319)係其中之一。
上月中曾推介於27元水平買蒙牛,上周五升到30.95元,與上月初高位30.80元形成雙頂,周線圖陰陽燭出現利淡的身懷六甲,走勢已轉差,好大機會下試50天線(目前在27.39元)。大市若見短線反彈,可考慮小注開蒙牛淡倉。
訂戶登入
下一篇: | 貿談結果成後市關鍵 |
上一篇: | 美麗傳承還是巴基之星 |