2019年3月4日
每逢農曆新年前後,就係公司周年聚餐和春茗大旺日子,要數今年較為別出心裁嘅上市公司annual dinner,優品360(02360)肯定入圍。該公司在上星期舉行嘅annual dinner,除了把場地布置成機場,有check-in指示板,安檢出入口更有工作人員化身機場保安,拖住隻氫氣球狗狗站崗,認真程度可見一斑。同時仲為賓客特製優品360護照同登機證,而公司管理層和員工,則變身機師、空中服務員,着晒制服相當醒神。
優品360晚宴上下一心
優品360今年annual dinner嘅概念,源自公司主題「夢想從這裏起飛」,為配合搞呢一場周年晚宴,所有道具製作認真,機組人員制服更加係搵咗大台幫手,為了這一晚,公司嘅marketing出了唔少力,仲花咗唔少時間籌備。而當晚嘅表演,公司並未有巨額花費邀請演藝嘉賓,反而是公司員工分成唔同組別作才藝表演,一班員工落力娛己又娛賓。抽獎部分唔算好特別及重份量,雖然唔似某啲上市公司,重量級銀彈,有些更甚至送埋名貴跑車,但現場氣氛高漲,老闆、管理層同基層員工打成一片,係一個好成功嘅晚宴。
況且公司每年都會請員工飛去日本,只要成為十大優秀員工,都可享有這個待遇,做得好自然有獎賞,唔使等周年晚宴大抽獎。
從優品360周年晚宴睇得出,公司員工都好樂意在一般工作之外,花心思同時間去搞呢類活動,老闆無架子,員工士氣高,上上下下一條心,難怪優品360近年發展一日千里,而公司更有計劃衝出香港,下一站將會先到澳門發展,至於澳門以外嘅地方,當然要時間研究,從長計議,避免過分擴張,反而窒礙發展。
過往唔少人都會將優品360與759阿信屋(00759)作比較,據阿Man觀察,兩者各有千秋,而優品360嘅企業管理自有一套,比較傾向國際化管理手法,為了提高員工士氣,老闆除咗好肯放手畀管理層去試去做,對出色員工亦給予獎勵,員工自然會出心出力。而公司亦不時會舉行大大小小嘅team building活動,團結員工,保持士氣高漲,亦係優品360嘅企業管理核心理念之一。
其實,一間公司嘅marketing和公關十分重要,做得好的可建立良好形象,好似今年優品360嘅周年晚宴,確係幫公司加咗唔少分,至少投資者可以睇到公司嘅管理,團結上下一心。
大昌行藉廚師腸省招牌
至於大昌行(01828)剛剛舉行嘅業績會,就充分體現把握時間做好公關工作,對公司所產生的正面作用。
大昌行今年業績不過不失,但適逢公司代理嘅其中一個高檔汽車品牌100周年,今年業績發布會移師到高檔名車Bentley嘅陳列室舉行,令各出席者能近距離接觸呢一部非一般名車之外,發布會同時宣布咗個消息,讓平平無奇嘅業績會得到廣泛報道,成功爭取曝光率。
在業績會上,大昌行食品業務主管宣布,深得港人喜愛但較早前陷入破產困境嘅「廚師腸」,將於3月份回歸市場,多得大昌行呢個代理出力協調,確保供應不受影響。雖然呢一包腸未必會令大昌行嘅業績有何驚人表現,但為了保留不少香港人的「集體回憶」,大昌行出嘅呢分力確令人欣賞,實在係一次好成功嘅宣傳,兼且可提升公司形象,公司嘅marketing同公關應記一功。
麥狄文(徐狄怡.證監會持牌人)
放大圖片 / 顯示原圖
訂戶登入
下一篇: | 老牛高峰過後 如何化危為機 |
上一篇: | 恒指季線處跌浪 29000現阻力 |