熱門:

2019年1月28日

高仁 財圈識真假

具中國特色幽靈票房

上文提要:在農曆新年送狗迎豬賀新歲之前,高仁順道推出題材輕輕鬆鬆的「中國特色」系列文章,打頭炮是具中國特色的上市公司頒獎禮,接着是具中國特色的高官或企業老總與「小三」分手方法。

各位「巴打」,中國人在農曆新年的喜慶大日子,都會尋求一些歡樂和放鬆的活動節目,例如到戲院觀賞一齣惹笑的賀歲片;惟「高仁指點」話你知,在部分上市公司耍弄財技之下,製造出具有中國特色的幽靈票房。

戴孤劃: 「鐵哥們」,咱們祖國真的好厲害,2018年電影總票房突破600億元人民幣水平,按年增長超過9%,達到609億元人民幣,成為全球第二大電影市場。

拍電影兼大玩財技

施友化:戴Sir,認真你就輸了,中國國情你懂的!

高 仁:冇錯。有上市公司之前就係透過拍電影大耍財技,製造幽靈電影觀眾同幽靈票房掠水,之後被人舉報調查揭發事件,才令內地電影同業開始有所收斂。

戴孤劃: (普「東」話,即普通話+廣東話)拍電影都可以玩財技!?你們快一點給我說吧!

施友化:據講,國內地產界一名土豪,早幾年突然高調踩入中港娛樂界,認識咗一批電影公司老闆。佢之後更大手投資中港電影,搵著名導演、大明星拍片,大力催谷自己嘅知名度。

高 仁:後來,佢仲成立咗一間電影發行公司,並且睇中咗一套由「地上最強」主演嘅港產功夫片,認為呢套戲嘅演員卡士夠強勁,一定會受到市場廣泛關注,決定重錘買斷套片嘅內地發行權。

變理財產品又掠水

戴孤劃:哦!我估計,他一定是把影片的收益權注入上市公司,以換取上市公司發行的代價股票,從而成為大股東。對不對?

施友化:戴Sir,呢個只係佢嘅頭盤嚟,掠水行動先係主菜。

高 仁:呢個老闆本身喺內地有搞開互聯網金融平台,佢想以呢套港產功夫片嘅票房作招徠,包裝成為理財產品賣畀公眾投資者。

戴孤劃: (再用普「東」話)怎樣去吸引一眾投資者「落疊」呢?

施友化:佢就係透過製造呢套戲嘅幽靈票房,例如凌晨兩三點都全院滿座嘅假象,誤導投資者信以為真,但其實戲院內鬼影都冇隻。跟住佢會話呢套戲咁收得,設定產品年化回報率超過10厘,咁咪吸引到投資者「落疊」囉!

高 仁:一方面,呢套戲嘅幽靈票房「大賣」,老闆嘅上市公司股價急升,引來盲舂舂嘅散戶接貨,佢就可以暗地沽貨套現;另一方面,老闆互聯網平台賣出呢套戲嘅理財產品,又成功喺街外吸多一筆水。

戴孤劃:但是紙應該包不住火,票房造假最終總會被揭穿。

施友化:當投資者醒覺時已經太遲,老闆可能已經捲錢逃之夭夭,喺外地「印印腳」嘆緊世界咯!

高 仁:哈哈!各位「巴打」,呢個就係具中國特色幽靈票房嘅可怕之處。

「中國特色」系列.之三

本欄逢周一刊出。

如想與高仁交流上市公司的財技個案及招數,請電郵至[email protected]

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads