熱門:

2019年1月14日

高仁 財圈識真假

具中國特色頒獎禮

各位「巴打」,中國農曆新年還有半個月便來臨,快將送狗迎豬賀新歲,高仁預先教導各位「巴打」幾句具中國特色的吉祥話,例如「豬」事順利、「豬」事吉祥、「豬」事如意、福相如「豬」、妙語如「豬」等等,好讓大家可以「傍身」。

趁着大喜慶日子之前,高仁決定為各位「巴打」推出題材輕輕鬆鬆的「中國特色」系列文章,本文打頭炮就是具中國特色的頒獎禮。

事先聲明,本故事基於現實撰寫,但可能有少許改篇。

高 仁:出年就係豬年,我預早祝大家都發過豬頭!(隨即夾起隻燒鵝髀給施友化。)

施友化:發!?唉!內地互聯網巨擘搞上市公司頒獎禮就真係發嘞!

戴孤劃: (用普「東」話,即普通話加廣東話)這是什麼一回事呢?

另類搵錢途徑

高 仁:其實,每年都有大大小小嘅企業舉辦上市公司頒獎禮,表面上係表揚上市公司過去一年嘅業績、企業管治、投資者關係等嘅表現,實際上只不過係一種另類嘅搵錢途徑。

施友化:我哋做得上市公司CFO當然會醒水,通常都會幫手贊助吓個活動、包番一兩圍枱、喺旗下網站落吓廣告等等,總之你好、我好、大家好。

戴孤劃:雖然大家都係心照不宣,但都明白是用錢換獎的吧!

施友化:弊在呢家內地互聯網巨擘嘅做事手法特別奇怪,之前打嚟話我哋上市公司得咗一個唔知乜獎,我咪問佢哋有冇嘢要幫手贊助吓,佢哋先話係唔使畀錢,因為佢哋搞嘅頒獎禮係好公正喎。點知……

高 仁:哈哈!點知……就梗係轉過頭上咗嚟公司搵你,話幫你間公司明年做廣告宣傳,仲索價幾十萬人仔啦。

戴孤劃:真的嗎?

施友化:高仁果然係高人,果然係料事如神。佢哋真係開價要半球(註:1球相當於100萬元),咁樣獅子開大口法,我哋當然係唔睬佢,話要再仔細考慮下,之後佢就死死地氣走咗。

高 仁:施友化,你哋咁樣耍走人,一定冇好結果。

施友化:冇錯。佢哋過咗幾日打嚟就話,雖然我哋公司喺網上投票嘅票數領先,但佢哋評審委員會覺得我哋基本面未達標,由於我哋通過唔到評審,所以今次最終冇獎。

戴孤劃:基本面未達標?你間上市公司基本面未達標?豈不是一場歡喜一場空。

施友化:戴Sir,呢個唔係有冇獎嘅問題,而係佢哋做事手法。我哋一早問佢話唔洗,點知掉轉頭又話要,真係畀佢哋玩死。

「虛名如浮雲」

高 仁:各位「巴打」,具備中國特色嘅上市公司頒獎禮,就係「有錢有獎,冇錢冇獎」,所以我都係勸喻大家,都係唔好對呢種遊戲太過認真了。

施友化:講得啱。其實獎項只係虛名嚟,就好似浮雲一樣。

高 仁:勁!「虛名如浮雲」。我上次「豬肉佬」上身,施友化今次「汽車維修員」上身。大家都講到攰攰哋,不如飲杯茶、食個包,一陣先繼續傾。

戴孤劃:(又用普「東」話)好的!

「中國特色」系列.之一

本欄逢周一刊出。

如想與高仁交流上市公司的財技個案及招數,請電郵至[email protected]

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads