《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年12月17日
唔知大家有冇留意，近呢個幾月，差不多個個星期都有三四線股仔出現暴跌，名不經傳嘅股仔登上跌幅榜，而單日跌幅閒閒地三四五六成。唔少行家老友見呢啲情況出現，例必問阿Man，係咪又有莊家爆煲，又或者同日出現顯著跌勢嘅股仔，有否連帶關係，會唔會係由同一莊家，又或者同一個廚房主理，其中一件出現追孖展或斬倉嘅時候，同系股仔被火燒連環船，齊齊過堂被狠沽狠劈。
阿Man每次見呢啲情況，就嘗試去了解嗰日急跌嘅股仔，係咪同出一門，又或者搵行家朋友索料，睇吓係咪有莊家出事。結果發現同日下跌嘅股仔，竟然毫無關係，甚至風馬牛不相及。
好似上周五，又見幾隻股仔同時暴跌，卒之由一個前輩口中得知，有個基金沽緊嗰幾隻暴跌股，仲係不限價清倉。基金沽貨，通常令人聯想到係內地私募基金爆煲摺埋急於套現，後來前輩指出，沽貨基金並非內地背景，該基金竟然來自花旗，屬於對沖基金，而基金亦並非出事應付贖回要沽貨，純粹因為夠鐘計數離場，所持股仔要全數清倉一股不留，自然不問價沽貨。
接近年結班師回朝
對沖基金沽貨並唔係等錢使，只係年底要計數離場，基金亦唔介意輸錢離場，狠沽股仔正正係想跌咁啲盈利出街，確係無奇不有。
有基金要專登買股仔輸錢咁離奇，阿Man自然要捉住前輩打爛砂盤問到篤，原來呢啲嚟自花旗嘅基金，喺今年頭三季投資美股贏到開巷；踏入第四季，雖然美股走晒樣，但是由於美股三大主要指數大玩過山車，對沖基金炒指數，同樣贏到笑，基金年回報率竟然高達三四成，明年要滿足higher water mark條款先可以將表現費袋袋平安，唯有搵啲另類投資輸番些少，拉番低個基金嘅整體回報，明年要交數亦容易啲。
要滿足呢個需求，呢類對沖基金就諗到港股呢邊唔少股仔嘅主要股東，都有按貨借錢嘅需要，就搵中間人搭路大搞share financing，接受按倉借錢畀主要股東。
反正自「謎網50」事件發生後，證券行大大收緊股仔按倉借孖展，有對沖基金肯按貨借錢，大把股仔排住隊伸手攞錢。若然持貨股東想乾手淨腳，唔按倉借貨就直接批舊股畀對沖基金，總之雙方各取所需，自然一拍即合。
當然股仔按倉借錢，又或者批股畀對沖基金接貨，例必要大折讓割愛，折讓批股之餘，更向中間人同基金經理大派中介費，聽聞曾經有中介人成功協助一批股仔嘅主要股東批股套現，銀碼以10億元計算，中介人費用幾千萬元袋袋平安，算係今年不濟市況中成功撈粗嘢。
而呢兩三個星期特別多股仔暴跌爆煲，正正因為接近年結對沖基金要班師回朝，計數離場，反正目的係為咗輸咁啲錢，沽貨梗係唔錫價。幸而呢啲股仔過往一向無乜成交，通常只會喺跟對沖基金交易前，做番十日八日好戲，搞番一百幾十萬元成交以滿足對沖基金接貨最低成交要求，所以呢批股仔爆到七彩，亦未至波及一般缸邊友同炒家。
麥狄文（徐狄怡．證監會持牌人）
訂戶登入
| 下一篇： | 反華為戰爭 掀全球災難 |
| 上一篇： | 消息面轉好 A股望穩步回升 |
