為保集資額冠軍傾斜新經濟股

每年接近聖誕新年，就係各大機構舉辦周年晚宴嘅時間，雖然今年個市表現麻麻，但年度晚宴點都要食嘅。金融業界唔同團體組織，亦會趁呢段時間舉辦大大小小嘅飯局，一來可以聯誼，二來亦會趁飯局聚會，檢討過去一年嘅工作表現，順便計劃來年大計。

阿Man聽聞近日港交所（00388）嘅上市委員會成員，近來頻頻吹雞約飯局，飯局對象就係一班投行嘅保薦人團隊，尤其係唔同投行融資部門舵手，上市委員會幾乎全部都約飯局。聯誼目的都係傾吓準備上市嘅公司有關安排上市事宜。

中小型公司上市條件收緊

聽講，港交所對今年港股集資金額重奪全球冠軍寶座甚為滿意，不過，就上市公司嘅質素，希望有所提升。

有份參與聯誼、搞開上市融資嗰班搞手圍內就傳得好行，話來年會收緊上市條件，換句話講，有人希望保薦人識做，喺物色上市公司時候做好篩選工作，搵番啲高質素公司上市，咪吓吓再搵啲集資額得嗰一億幾千萬嘅中小型公司。

對於提升上市公司質素，業內人士一向同意，希望可以一洗過去港股被莊家控制中小型股，專門洗劫小股民，專坑小股東血汗錢嘅黑暗面。

不過，奇就奇在圈內風傳又係另一回事，一邊話要提高上市公司質素，提高公司上市門檻，另一邊又鼓勵業界要盡量協助新經濟股上市。

仲話最好係搵多啲創科獨角獸嚟香港市場掛牌，皆因獨角獸市值閒閒地超過10億美元，集資額有番咁上下，咁香港就可以保住全球股市集資額「冧巴溫」呢個位置。

眾所周知，大部分嘅創科公司，即使去到獨角獸級數，甚至巨無霸獨角獸，已達過百億美元市值都好，亦未必有盈利，能夠做到收支平衡已算本事，十居其九創科公司都喺燒錢階段，新經濟股要成功扭虧，道路通常係漫長而艱苦。

如果一邊又話要改善上市公司質素，但另一邊又要鼓勵冇盈利，甚至無收入嘅新經濟股上市，實在有啲自相矛盾，難怪一班搞開上市嘅banker，私底下都怨聲四起，話咁搞法實在難做。

審批標準不一易出事

再睇番大部分已掛牌嘅新經濟股，好似舊年上市嘅新經濟股，包括眾安在線（06060）、閱文集團（00772）、美圖（01357）、平安好醫生（01833）、雷蛇（01337）跟易鑫（02858）等，現價均已跌穿招股價。再數埋今年兩隻以「同股不同權」形式上市嘅新經濟股小米（01810）跟美團（03690），同樣難逃跌穿招股價嘅潛水命運。

呢一批新經濟股，現價跟招股價相比，閒閒地跌三成或以上，合共已蒸發千億元市值，小股東可以話損失慘重。

若港交所執意對新經濟股嘅上市審批手鬆鬆，相反舊經濟公司規模略細嘅就加高入場門檻，咁做港股質素未來只會更加唔平衡，為咗維持集資額而傾斜向新經濟股，做法似乎有啲本末倒置。

麥狄文（徐狄怡．證監會持牌人）