《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年11月26日
2018年仲有一個月左右就過去，雖然近日大市整體成交金額愈玩愈縮，但今年喺新股上市集資金額方面做得唔錯，單係今年首三季，新股集資金額已達2427億元，按年增長177%，新股集資額排名第一。如無意外，今年港交所（00388）新股集資額可成為全球交易所一哥，再次登上冠軍寶座。
今年新股市場未受大市投資氣氛轉弱所影響，加上港交所修改咗上市規則，容許企業以同股不同權，以及「無收入、無利潤」嘅生物科技企業嚟港股掛牌有關。好似小米集團（01810）及美團點評（03690）兩隻同股不同權掛牌嘅新股巨無霸，純以新股集資額計合共集資約620億元，已佔了首三季新股集資金額四分之一。
匿名舉報 啟動調查
對於新股上市，港交所當然係多多益善，希望做得幾多得幾多，不過要通過上市嘅公司，雖未至於過五關斬六將，但當中嘅程序同時間，點都要花上一年半載。若然中間有乜差池，上市夭折，集資唔成仲要使咗一筆搞上市嘅費用，對好多發展中嘅公司嚟講，輕則業績見紅，嚴重嘅上市唔成，成為致命一擊。
阿Man最近收到風，唔少不同行業嘅公司，為咗打擊競爭對手，若然得悉行家已開始啟動上市計劃，即係搵晒上市團隊開始搞上市，就會出盡陰招阻止對手上市，目的當然係利用對手搞緊上市期間，搞到對方雞毛鴨血，趁佢病攞佢命，順勢搶佔對手嘅市場份額。過往嘅陰招不外乎以匿名方式向證監會舉報對方，指對方做假數、瞞稅等等。而證監收到舉報，當然要開case調查，咁搞緊上市嘅公司，上市計劃自然受阻。
據了解，一直以嚟，證監會幾乎日日都收到相關舉報，無論係上市公司，又或者申請緊上市嘅公司，匿名舉報多不勝數，好多時因為證據不足，相關舉報最終或不了了之。所以近期唔少公司為咗打擊搞緊上市嘅同業競爭對手，而改為向「唉記」舉報。「唉記」對於可能調查對象，定必通知證監會或港交所，咁呢啲懷疑可能被「唉記」調查對象，上市審查即時煞車，上市申請遙遙無期。
其實香港唔少公司上市前，都會運用會計技巧去令公司交少啲稅，但呢個做法往往畀行家捉住痛腳，拎去報寸，到頭嚟令上市計劃受阻。
謎網牽連扯埋落水
舊年「謎網50」事件發生之後，唔少非謎網風眼人士，因為曾經跟呢批公司有過交易或來往，亦被扯埋落水，聽聞更有準備上市嘅公司，因為管理層曾於「謎網50」公司工作，或者有生意來往，亦被金手指去「唉記」篤背脊，搞到上市申請被拖延。阿Man最近聽到因為成為「唉記」嫌疑調查對象，而上市計劃泡湯嘅公司已唔止一家，估計「唉記」亦無預期會被利用為阻礙公司上市集資嘅工具。
麥狄文（徐狄怡．證監會持牌人）
訂戶登入
| 下一篇： | 「滬港通」及「深港通」上周收市統計 |
| 上一篇： | 觀望習特會 買貨意欲退 |
