熱門:

2018年11月12日

麥狄文 金融街密語

九頭身美女有情義 按樓救男友

呢兩日網上消息流傳,九頭身美女男友因為洗黑錢被捕,不過,該訊息仍未證實。九頭身美女率先喺社交媒體發帖文,否認有關傳聞之餘,更表示唔再容忍該失實報道,準備起訴涉事媒體。九頭身美女跟男友相戀多年,為對方先後生下兩仔一女,雖然男友一直未正式迎娶其入門,但對女友出手闊綽,先後贈予大量現金、首飾及豪宅,同埋上市公司股份,令美女一躍成為億萬富婆,而她亦唔會收收埋埋,閒時就喺社交媒體上晒幸福兼炫富,令唔少網民相當葡萄。

葡萄網民當然會話九頭身美女只係為咗錢先甘願無名無份,為男友做生仔機器,一旦男友有乜冬瓜豆腐,必定大難臨頭各自飛。尤其美女現時身家豐厚,萬一男友要仔唔要乸,日後生活亦無憂。不過,最近阿Man收到風,九頭身美女較早前似急於調錢周轉,委託中間人去財仔幫自己位於西半山嘅兩個物業查詢按揭問題。

斷估美女坐擁數以十億計身家,又無話經營緊乜嘢生意,應該唔會需要大量錢銀周轉,須拎手上物業去搞按揭,唯一解釋係身邊人等錢使。除咗近日被傳一身蟻嘅男友之外,都冇乜邊個可以令美女肯交出身上物業套現。

話時話近呢大半年,內地確有唔少民企周轉不靈,最近更要阿爺幫到出面,由中國銀行保險監管管理委員會主席發表「一二五」目標,擬要求中國銀行增加民企貸款比例,引來市場波動。唔少缸邊友都擔心一旦「一二五」目標實施,對內地銀行業務將產生不良影響,如不良貸款比率上升,令資產質素下降。

阿爺促增貸民企背後

若然內地所有銀行都要焗住貸款畀民企,對多年嚟實現市場化嘅內銀市場又確係一大倒退。但諗深一層,過去內銀主力貸款予國企及基建項目,對於民企融資,銀行其實未擔當一個重要角色,主因內地銀行覺得民企質素參差,寧可將呢類貸款拱手相讓予其他金融機構,如由券商進行融資或交由影子銀行去冒呢個險。

其實,銀行唔應該只擔當一個借貸人角色,一個成功嘅銀行家應該要扶持企業發展,甚至向客戶提供意見,令企業客唔單止能夠存活,更要成功做大做強,銀行與客戶先能夠達到雙贏局面。惟自內地經濟改革開放以來,內地銀行業似乎未能成功擔當呢個角色,尤其國有銀行只係集中貸款予國企及基建項目,鮮有扶持民企由萌芽階段做到壯大。

唔少巨無霸級嘅民營企業,好似騰訊(00700)、阿里巴巴等,有邊間喺成立之初唔係芝麻咁嘅size。放眼能夠成功壯大成為全球知名嘅國際企業,內地銀行喺佢哋成長路上似乎未有太大參與。今次阿爺落柯打要內地銀行加碼向民企放貸,從另一角度睇,係畀個機會內地銀行考考眼光,選擇貸款給邊一啲民企,以及如何透過銀行服務幫助有潛質嘅民企做大做強。

麥狄文(徐狄怡.證監會持牌人)

 

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads