熱門:

2018年10月24日

邱古奇 股期出擊

維穩博彈 平保細注Long Call

股市確實難估,恒指前日大升近600點,好多人估會調整,等跌兩三百點買貨,但勢估唔到昨日最多竟然跌過838點,低見25315點,收市略回至25346點,仍要慘跌806點,前日升幅抹去有凸。

點解跌?似乎除了道指期貨午後大跌約200點之外,冇其他明顯原因。美國科技巨企如亞馬遜、Alphabet、英特爾、微軟等周內都會公布季績,市場習慣抱有期待,業績容不得任可閃失。昨午亞洲時段美債價升孳息跌,反映唔少資金避險。10月的美股,始終係好多人的夢魘。

恒指上周五同本周一連彈兩日,由低位計反彈共1144點,回吐意料之中,但跌到幾乎全無支持,則屬意料之外。技術上呢兩日升幅的0.618倍在25527點,昨日已經跌破,後市可能會再下試25000心理關口,守得穩就3底回升,守唔穩好友都幾麻煩。

預期P⁄E可降至10.6倍

照計阿爺同股市打補針,加上國家主席習近平南下主持港珠澳大橋揭幕禮,藥力唔會咁快過。如果外圍拖累,斷估阿爺好大機會繼續出招維穩。有老友提醒,阿爺係維穩股市,唔係要炒起個市,千祈咪期望過高。講得有道理,不過既然出手維穩,冇理由只得兩日貨仔,就任由個市再散過。

如果阿爺真係頂得住A股,內險股應該有得諗。博反彈,當然係選龍頭股中國平安(02318)。公司中期業績交出功課,半年淨利潤580.95億元人民幣,增長33.8%;新業務價值增長0.2%至387.57億元人民幣,均勝市場預期。

平保股價由97元樓上跌至現水平,昨收報75.9元,估值不再離譜,往績P⁄E降至12.69倍,若今年全年每股盈利增長兩成,預期P⁄E將降至10.6倍,以正常市況計一定唔貴。當然在惡熊當道的日子,估值可以低處未算低。

大跌市中買貨,好考勇氣。買五手平安,要將近19萬元,計埋使費成廿萬,唔想擺咁多籌碼入市,買期權係一個選擇。11月行使價77.50元的平保Call,昨成2.16元,Long五手只需5400元,輸晒都係呢個數,而且使費平過買正股好多,最啱細細注大大聲的筆者。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads