債重內房股抵都唔買

美股周二晚發威，三大指數都升逾2%，升因係季績好。港股夜期急漲385點報25722點，大高水310點，不過A股不為所動，就算昨晚美股續升，今日港股都唔知跟邊個。

美國財政部發表國際資本流動（TIC）報告，中國連續3個月減持美債，8月份持有美債1.1651萬億美元，按月減少59億，而日本所持美債亦減至近7年新低。

有趣的是俄羅斯，TIC報告再無其身影，因為佢唔再係美債主要海外揸家，有留意國際財經的都知道，俄國早已唔揸美債揸黃金。

同日IMF數據顯示，美元在全球央行外儲中的佔比降至62.3%創5年新低，期內歐羅、日圓及人民幣的佔比明顯提升。數據話畀大家知，去美元化確實在進行中，呢個問題可以寫幾本書，這裏只想提出一點，若然國際對美債需求持續減少，「侵侵」又大花筒，美債息率好難唔升，除非聯儲局又嚟個N次QE啦。

碧桂園賬面呈大幅溢價

內房股周二反彈，碧桂園（02007）升3.7%表現較好，不過現價8.18元，同年初高位19.16元比較仲係冇咗57%。

老友話，高盛出報告，指內房股股價較NAV平均折讓59%，抵買，而行業首選係碧桂園。股價反彈可能與此有關。

老友唔明，大利市機見到的碧桂園每股資產淨值（NAV）係5.2774港元，股價明明有溢價，何來大折讓？原來大家口中常說的NAV有兩種，一是Book NAV，只計賬面數，翻開年報，搵出股東權益數字，除以發行股數，就得出Book NAV，大利市機列的係Book NAV，照呢個數計，碧桂園現價溢價高達55%。

另一種係Appraised NAV，即係重估後的資產淨值。公司持有的地皮、未售物業等資產有時會以成本入賬，但在樓市大旺時，這些資產升值甚多，所以大行分析員會以其專業知識，去重估資產價值。德銀早前出過報告，估今年底碧桂園每股NAV有26.05港元，股價當然係大折讓啦。

兩個NAV邊個準，筆者唔知，不過就算抵都唔買債重內房股。內地樓市已見拐點，唔減價難賣樓，減價賣樓又畀群眾凶，公司點套現？