《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年10月15日
日前證監會法規部執董出席論壇時表示，喺過去一年，證監動用大量人力物力打擊企業欺詐行為，搜查行動涉及的規模及人手，係該會有史以來最大，有關行動嘅次數亦差唔多較舊年多一倍。其實，自去年「謎網50」事件爆發後，不時見有唔少四五六線嘅上市公司股價暴跌，但暫時唔見有好多缸邊友損手，可能缸邊友對莊家股早已敬而遠之。
反而GEM股不時有苦主表示中招，買入呢啲股份原因，不外乎係朋友話收到堅料，朋友個三表哥個同學個姑媽個仔喺某某公司做高層，收到風會喪炒，唔搭順風車就對唔住自己。講到尾都係用對耳仔嚟炒股，而唔係用對眼去觀察股價走勢，又或者睇公司資料，做完分析先買入。
不過，九成九嘅散戶都傾向聽消息炒股，呢一種係最低層次嘅散戶，基本上可以話十炒九輸。有另一種散戶，就透過不同媒體收集資訊，尤其係最鍾意睇股評人、財演又或者KOL推介，諗住信專業人士一定無得輸。
專家未必靠得住
一般股民散戶都認為可以喺公仔箱做節目、報紙雜誌出得投資專欄嘅股評人，可靠性應該比起一般只有喺社交平台發表意見嘅KOL或blogger較高，話晒公仔箱或報紙呢啲媒體，有一定公信力。
話就係嘉賓作者意見，不代表該台或該報立場，但始終有導演、監製同編輯把一把關，感覺上嗰啲投資專欄嘅意見，睇落可信性會高啲，至少唔會好似來歷不明嘅微信女，唔知係代表乜嘢炒股集團，又或內地莊家，喺微信呢類社交平台放流料出貨，尤其係嗰啲證監會持牌代表嘅財演或股票人，即使推介股份心水，未必一定百發百中分外高質，但至少唔會好似微信女專派創板山埃，目的純為坑死散戶派貨。
如果閣下真係咁諗就實在太天真，阿Man發現近呢幾個月，某個入行超過10年，但近幾年先活躍嘅財演，就不時喺友報專欄嘅股份推介，同微信女撞晒冧巴。
唔知係咁啱得咁蹺，又抑或嗰位財演有個微信女老友，又抑或微信女跟住嗰位大哥嘅推介畀貼士，總之就係巧合地幾隻GEM股都係差不多時間推介。推介完呢，時間一定唔遲又唔早，喺三至五個交易日內，嗰隻推介股定必暴瀉，跌三至五成係基本消費，最誇張嘅瀉足九成先到終點。
阿Man同幾個行家吹開水，都驚訝呢位財演甚為誇張，身為本地某大證券行持牌代表，而呢間證券行仲已經泊咗個內地證券行碼頭，都算得上係一線大行，呢位仁兄竟然夠薑打正公司牌頭，喺友報專欄推介嫌疑微信女嘅創板股，確係藝高人膽大。
阿Man講笑話，推介十次九次有伏，究竟邊個仲會睇？口痕友話一定有人睇，至少證監嘅調查小組可能會睇……
連被視為專家嘅專業持牌股評人都可以唔顧後果推介高危GEM股，以後各位選擇資訊時真係要隔一隔渣，投資自己口袋裏嘅錢，點都要諗過度過，起碼用一用腦去分析過濾，咪以為專家就一定靠得住。
麥狄文（徐狄怡．證監會持牌人）
放大圖片 / 顯示原圖
訂戶登入
| 下一篇： | 支持明日大嶼 投資香港未來 |
| 上一篇： | 內地娛圈「洗錢」方法揭秘 |
