2018年10月5日
「高鐵2.0版」人工島即將上馬,在現今環境係唔會無法推進。人工島比高鐵更易推行,因為填海唔使講經濟效益,用一萬億填海,起公營房屋同綠化空間,難道你會問如何收回成本?填海要計成本,但按照高鐵嘅案例,必定先告訴你一個平價,之後再超支,反正必定撥款,無人會贊成填海填一半,太貴然後收手,因為填一半就真係倒錢入鹹水海,毫無用處。
而家由民間智庫聯同專業顧問,一齊由下而上硬銷諗得過,政府就可以順應民意起動。近年政府大搞基建養肥了唔少人,今次天文數字大填海,睇怕肥到着唔到襪。
填海本身冇問題,但推填海做法核突,好哋哋等土地大辯論報告出籠,科學化地講有幾多人贊成填海,政府去馬,好多人唯有收聲。而家報告未出,先來研究大填海嘅打手出嚟大賣廣告,仲要搵民間特首用聲音在鏡頭後讀悔改書,叫人感覺好唔舒服。年底出報告,等多3個月都唔得?假到出汁嘅辯論,反而妖魔化咗填海,本來係好事,都變成了國家級宣傳。
最弊係支持填海嘅WhatsApp內容在群組瘋傳,無端白事令填海變成分化香港人嘅工具,要人歸邊是否「填派」。好不容易生活回復供樓同睇電視,而家又要煩惱如何不讓人知道自己是否支持填海。民間特首照稿讀話香港點解唔向前行,就係呢啲廣告叫醒想瞓同想麻醉自己嘅香港人,香港沒有向前行,仍然困在內鬥嘅漩渦。不過正如我們要知道自己生活在什麼主義,香港這一塊地方仲有借來的時間。昨日我所講嘅偶像,唔係馬雲,係我們另一位德高望重嘅民間特首──李首富。永遠冇人可以比佢更厲害,是中環人嘅共識。佢識得如何作資產調配,全香港無人能及。天價填海,始終有塊土地交畀你,反而用公家錢來投資項目,市民嘅錢可以比填海更加掉入鹹水海。寫文章令人經常思考,但活在某種主義,思考是令人痛苦。
訂戶登入