2018年10月5日
10月4日,周四。皇天不負有心人,美國10年期債息上周二試足成晚都去唔到5月今年高位3.128厘,經數天整固後,周三終於來個真.爆升,非但一舉突破5月高位,且創下7年新高,執筆時造3.204厘。
老畢上月搭建的美國長債ETF(代號TLT)「熊跨組合」(Bear Put Spread)(見9月12日〈狂人All-in可以點Trade〉),上周二差半步到不了目標價,之後數天債息回順,TLT略見反彈,在下曾想過降低目標按市價平掉這個「熊跨」,但心有不甘,開倉以來20個基點都行咗,冇理由就差臨門一腳,遂決定等埋本周五公布的美國9月份就業報告,由萬眾矚目的工資增長決定這個trade食粥食飯。
最怕明賺變蝕
勢估唔到,數據尚未公布,美國10年期債息周三於一天之內升足12個基點,息升則價跌,追蹤美國長債價格的TLT連穿多個大位,觸及在下預設目標水平,結果毋須等埋就業報告便順利食糊。
有錢賺當然開心,但老畢想跟大家分享的是:運氣往往比眼光重要。此刻人人都看得到債息升勢凌厲,事後找原因解釋,意大利民粹政府向市場「跪低」、ADP私營部門職位勝預期、鮑威爾言論「偏鷹」,A、B、C餐任揀,哪個理由都說得通。然而,當你有盤在手,而以上一切皆未發生時,做決定就很難很難。
資產價格唔係落就上,作為交易者,最怕是明賺變蝕。就拿老畢上周情況為例,差一兩個基點食唔到糊,美國10年期債息接着回順,最低去番3.01/3.02厘水平,一旦3厘不保,在下隨時吃不了兜着走。最後做了「等」這個正確決定,非因有什麼先見之明,睇穿意大利五星運動、北方聯盟冇吉士,畀市場大一大就讓步都讓唔切;更非隔晚收到聯儲局主席來電,通知我佢會噏乜。我只是不甘心按市價平倉離場,係都要等埋美國就業報告,輸贏始無怨無悔,就是那麼簡單。事後回望,這個決定當然啱,但當時要落判斷,不論去留都甚磨人,最終得手點會唔講運。
債息急升對經濟和股市皆非好事,美股今年初正是因為這個原因急插一成。香港息口跟美國,經濟卻更受內地因素影響,加埋美元強勢,港股弱過藥煲唔係無法解釋。息魔此番來勢較年初更兇,美股會否再次受累,縮骨講句在下不知。可是,有一點唔講唔舒服:美股縱跌,也不會因為論者十幾個理由數到口乾而被「唱」到跌。如果靠把口就可以推冧美股,道指、標指第三季焉能分別勁升9.6%和7.7%,雙雙錄得2013年至今最強季度表現?
若非千真萬確發生咗,閣下一定以為發緊夢,皆因過去三個月聽埋聽埋,唔係貿易戰就係新興市場危機,即使美國次季GDP增長超越4%、企業盈利增長高達雙位數,論者都會搵嘢嚟拗,好似美股唔衰下唔到台。講得咁肯定,點解唔慳番啲口水落盤trade?
直都拗番攣?
華爾街第四季升跌我唔知,可是作為交易者,造好造淡以至什麼市場、哪種工具都不重要,最緊要食住個勢做嘢,與錢有仇才會同個勢拗。適當的前瞻當然要有,但唔係「前瞻」到冇雷公咁遠,繑埋雙手等待perfect storm肆虐人間。
舉個例,美國就業市場強勁大概無人可以否定,但你看Zero Hedge一類包拗頸的網站,永遠唔睇大Picture,係都要執着於就業不足率(under-employment)、勞工市場參與率(labor market participation rate)一類細微細眼的環節,以為針對數據中這些「弱點」,便能直都拗番攣。即使此輩說法並非全無道理,惟單憑這些,難道就能令美國就業市場整個形勢一百八十度逆轉?投資求財非求氣,同「勢」過唔去,等於同荷包過唔去。
放大圖片 / 顯示原圖 放大圖片 / 顯示原圖
訂戶登入
下一篇: | 肥到着唔到襪 |
上一篇: | 香港股市上日收市統計 |