熱門:

2018年9月24日

麥狄文 金融街密語

建築股水準一蟹不如一蟹

颱風山竹吹襲香港已過咗一個星期,市面上情況開始回復正常,今次呢個超強颱風吹毁嘅大樹不計其數,最嚴重嘅係今次全港不少住宅及商廈,竟然吹爆大量玻璃窗。當中最誇張嘅係位於其中一個當風位置嘅紅磡海濱廣場,今次爆玻璃窗嘅數量,據聞超過500塊,相對10年前黑格比吹襲香港,懸掛8號風球,海濱廣場第二座同樣重創,當年近百塊玻璃破裂,今次情況嚴重得多。

工程隱現豆腐渣

據聞2017年天鴿吹襲港,海濱廣場亦難幸免,被吹爆嘅玻璃數目亦有一百幾十塊,不過今次數量達幾倍之多,情況不單止重複發生,而且更一次比一次嚴重。

阿Man八到為去年修復海濱廣場嘅玻璃,需時幾個月,因為單單係訂貨已需時兩三個月,再加上要安排時間組裝,足足花咗4個幾月時間,先至將去年天鴿吹爆嘅玻璃收復。估唔到整好未夠一年,有關玻璃承建商好似連尾數都未全部收妥,該廈又整多一劑更勁嘅,舊數未清,又嚟多一單新job,工程接咗尾數幾時收妥都話唔埋,承建商再接今年呢張單,心情都可以話極度忐忑。

今次山竹造成嘅破壞,唔少人感慨何以香港會跟豆腐渣工程扯上關係。當然,氣候變化令吹襲香港嘅颱風愈嚟愈強勁係一個原因,除咗因為颱風而吹爆大量玻璃嘅商廈,事實上近年多項大型基建工程,都出現甩甩漏漏嘅情況,包括港珠澳大橋疑似飄移人工島、沙中線嘅短樁及沉降事件,以及港鐵港島南區線嘅車站漏水等,令人感慨近20年嘅香港建築工程質素每況愈下,建築商嘅水準似乎一蟹不如一蟹。

過往香港嘅大大小小工程,一直由十隻手指數得晒嘅大型承建商一手包辦,但近10年較小型嘅建築商,紛紛透過上市集資,喺資本較為充裕嘅情況下,過往被視為唔多入流嘅承建商,亦有能力競投較大型工程。

另一方面,內地承建商亦相繼南下,內地承建商嘅質素同標準如何,近年由內地承建商負責嘅公營房屋出現鉛水問題已可見一斑。

淪為啤殼工具

至大鑊係唔少建築公司,透過上市集資,有唔少更加係受到金融圈中一班出名玩財技嘅人游說上市,本末倒置下,建築公司所提供嘅服務,質素又點會認真搞好。

本來建築公司上市集資壯大資本係好事,可惜喺一班玩財技嘅金融人操控下,呢啲建築公司淪為啤殼工具。個別老闆受感染下,亦變成沉迷財技,聯同中港莊家將其股票舞高弄低,變得不務正業,對於工程監控亦得過且過。為咗盡量砌靚盤數上市,喺用料及用人方面,當然將貨就價,令豆腐渣工程頻現。

至於建築行業嘅一、二、三至N判嘅制度,亦令拖欠工程費及工人薪金,變成行業中一個唔合理,但又公認嘅行規,發展商拖承建商數,承建商一判拖二判,二判拖三判,三判又拖欠工人。

儘管近年香港建築業持續受惠多項大型基建工程,及加快房屋供應,賺到盤滿缽滿,偏偏建築股就未見估值上升,個別炒到出煙嘅建築股如「電視花旦」股,亦不過係受莊家操控,建築股始終問題多多,叫人如何放心投資,呢個正正係整個板塊一潭死水嘅原因!

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads