《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年9月17日
大市上周走勢如坐過山車，周一至周三失速急墜，恒指最低跌至26219點，刷新熊市低點，其後傳出美國邀請中國重啟貿易談判，港股好友大報復，恒指周四勁升669點，周五再漲271點，收市報27286點，一周累升313點。不過，身邊股友幾乎一致認為只係死貓彈，彈完再散。
技術上恒指周線圖及月線圖陰陽燭均出現錘頭，日線圖及周線圖的9RSI均見底背馳，大市延續反彈並不出奇，問題係彈得幾高。以最簡單的黃金比率計，恒指若反彈1月以來跌幅的0.236倍，目標係27933點；如反彈跌幅的0.382倍，目標係28994點。
話雖如此，彈得幾高都係要問吓侵侵，佢老人家隨便一句，都可以推跌個市。好似上周五晚，據報侵侵已指示幕僚推進落實向2000億美元中國貨品加徵關稅，消息令夜期急挫312點，如果佢進一步決定向另外2600億美元中國貨開刀，反彈隨時夭折。
筆者以為，侵侵之所以邀請中國（佢話係中方要求）重啟談判，係為咗應付國內的反對聲音。就在美國提出邀請之前幾日，86個美國行業協會宣布成立「美國人支持自由貿易」聯盟，與「農場主支持自由貿易」聯盟一同反對加徵關稅，聲勢相當浩大，為咗11月中期選舉的選票，侵侵點都要做吓樣，至於談判誠意有幾大，要問佢至知。
現階段若博反彈，筆者寧以期權或即市期指為工具，而不取正股。無論指數期權還是股票期權，好處是手續費低，而且Long Call博反彈，雖然可以total loss，但買1千最多輸1千，容易控制風險。買正股使費大，而且一個浪冚埋嚟，如果落唔到決心止蝕，好易坐艇。
中鐵建水位勝中鐵
熊市之中，筆者一向比較睇好基建股，阿爺要穩經濟，少不得搞基建。近日基建股又見起動，中國中鐵（00390）剛剛創出今年新高，上周五報7.08元，往績P⁄E8.83倍。
基建股毛利率好低，P⁄E一般唔易升離10倍，中鐵如果升到8元樓上，宜分段減貨。同業中鐵建（01186）往績P⁄E6.95倍，水位可能較大。
放大圖片 / 顯示原圖
訂戶登入
| 下一篇： | 本港零售增長受考驗 |
| 上一篇： | 長期升軌失守後抽 恒指一浪低一浪 |
