2018年8月24日
究竟將來仲有冇賣殼呢回事?如果一個買家最近一年有睇新聞,佢應該知道買殼係賠錢嘅舉動,只有一個理由佢要買殼。
點解買殼係賠錢?買殼,用幾億買晒成手股票,跟住點?要等3年先可以放資產入去,前提是如果你放到的話。
而家用上市公司收購資產,買件大少少、虛少少嘅對象,難度很高。買啲實淨啲嘅項目,話明係殼,上市公司當然係冇乜資產,咁又可以用什麼資源換一件大項目?無法注入項目,要隻殼有什麼用?
殼,入面應該係冇肉,有肉就唔叫殼。現實係如果上市公司內裏太過空心,隨時被DQ。買隻殼返嚟等3年,期間隨時被DQ,仲唔係血本無歸?有實際例子,殼都未轉晒手,已經成為DQ名單,買家如何追討,有待考證。
但如果上市公司並非空心,扎實有業務,仲弊,你起碼要陪買家坐3年,仲要等佢未來成功注入項目。同買家三唔識七,只係一次過利益關係交收,卻要一起幾年,萬一佢失聯、同人嘈交、欠債、押股,殼嘅身份未明,連帶肉嘅命運都被迫放在砧板上。3年,唔止買家風險,賣家都瞓唔着。
唔賺錢嘅公司可以輕鬆上市,其實都唔需要買殼。以前因為唔符合要求,先借殼上市,家陣上市容易,仲使鬼借殼?買殼要畀香港人賺一筆,上市仲可以賺你香港人一大筆,條數太易計。
最弊係買殼之後,印唔到股票,買殼要回本,就要賣股票再印股票,而家股票賣又賣唔到,印又印唔到,是蝕本生意。殺頭生意有人做,蝕本生意只有政府會做。你見而家大量股票市值低於殼價,創業板竟然市值2000萬元,就知道殼呢樣嘢再講就等於你out。
只有一個理由買殼?是什麼?上市公司可以保存資產,最安全。始終政治風險,唔知幾時會被人找上門。用上市公司存放資產,是唯一理由。
訂戶登入
下一篇: | 本輪反彈已完結? |
上一篇: | 「滬港通」及「深港通」上日收市統計 |