猶太沽空基金偷跳揭秘

上文提要，本港金融圈有猶太沽空基金肆虐，其大中華區CEO「鯊魚」以高LTV（Loan-to-Value，貸款對價值）兼平息作招徠，先去息誘上市公司大股東光顧，之後竟有意想不到的蠱惑偷跳行動。

「高仁指點」話你知，「鯊魚」其實可以進行令大股東意想不到的蠱惑偷跳行動，就是其擁有一套獨門的秘方。

在披露對話實錄之前，請各位「巴打」重溫人物背景，簡介如下：

戴孤劃──又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東；

程更計──本地證券行經紀兼財務顧問，除了招呼散戶之外，亦向上市公司出謀獻計；

「余生」──猶太沽空基金大中華區CEO，專門從事另類貸款公司生意。

程更計：戴Sir，你之前係咪問，既然大股東已經補咗倉，點解見到「鯊魚」仲可以喺度沽貨？

戴孤劃：對呀！我就是不明白，為什麼不可以阻止他們呢？

高　仁：哈哈！各位「巴打」都知道，鯊魚對於血腥味道非常敏感，只要聞到啲魚（主要股東）有「血腥」味（財力不足），知道啲魚響邊度受咗傷，就會去乘勝追擊。我相信Shark Yu亦都一樣，佢亦都有一套獨門秘方，以方便佢做偷跳。

並非港註冊變相冇王管

「余生」：首先，我哋呢類公司都唔會喺香港註冊，而係喺瑞士、馬紹爾群島註冊，仲有抵押股票嘅託管行更可能係其他國家嘅券商，即係所謂嘅「山高皇帝遠」、「冇王管」囉！

程更計：其次，據我所知，你哋會聲稱係並非《證券及期貨條例》下嘅註冊財務機構或持牌法團，不受證監8類提供證券保證金融資產項目所規管；換言之，大股東出事都可能會不受保障。

高　仁：第三，大股東抵押股票孖展融資，「鯊魚」會要求對方簽署「全面控制賬戶協議」，由「鯊魚」全權操作大股東賬戶，方便喺貸款期「射倉」轉走啲股票或者轉移借款。

「余生」：我哋drawdown貸款金額多數係兩至三年，但會以不同條件分批發放，全數收取股票抵押品。

為咗避免主要股東中途提早還款要償還股票，我哋會喺協議列明首一年半至兩年內不能夠提早還款，而且一定有rehypothecation（再抵押）條款，賦予我哋再抵押股票嘅權利。

程更計：表面上，「鯊魚」呢類貸款公司做到高成數嘅融資；但實際上，佢哋通常係以VWAP（Volume-weighted Average Price，成交量加權平均價）或貸款前一日價格計算貸款金額。

攬大股東貨源抵押融資

高　仁：冇錯。孖展融資嘅第一筆貸款可能係由「鯊魚」借出，但第二、三、四筆就係透過大股東嘅資源去滿足，因為「鯊魚」已經將啲股票再做抵押，而且價值遠遠高於貸款金額。正所謂「羊毛出自羊身上」，「鯊魚」所承受嘅風險極低。

程更計：「鯊魚」有一批低風險股票在手，唔使償還股票住，跟住咪可以為所欲為，喺高位沽空大股東嘅股票，之後咪可以喺低位買番手貨，可以從中不斷重複搵食。

戴孤劃：原來猶太沽空基金偷跳秘方是這樣子的，怪不得會有一些大股東被騙了。

本欄逢周一刊出

如想與高仁交流上市公司的財技個案及招數，請電郵至[email protected]。

下一篇：	發展區塊鏈港具環境優勢
上一篇：	黃金永恒牛派對與錯

文章：