2018年8月13日
土耳其貨幣里拉上周五急跌逾兩成,原因是美國狂加關稅,土耳其總統埃爾多安話美國發動經濟戰。一如我所講,貿易戰最終唔係引發貨幣戰,本質係經濟戰,企圖打擊別國經濟,以爭取更多經濟利益為目標。美國先同中國開戰,繼而歐盟,然後制裁俄羅斯同伊朗,現在對付土耳其。美國以強美元同經濟上升動力作為本錢,實行同全世界開戰,鞏固美國的全球霸主地位。
土耳其要反擊美國,計劃與中國同俄羅斯行得更埋,仲想用自家貨幣進行貿易結算。美國可以咁惡,正因為只有美元係全世界都信任嘅貨幣,唔怕變廢紙,可以作為儲備。你估中國唔想貿易結算可以用人民幣,但要交易方肯受先得。土耳其里拉冇乜國家肯受,反而中國可以叫土耳其買人民幣用來結算。
美國恃着美元獨大周圍撩交打,使其他受氣國家連成一線,逐漸脫離美元稱霸嘅局面。被美國欺負嘅國家自行搞自由貿易區,用搞手國家嘅貨幣結算,抗衡美國,這就是貨幣版「一帶一路」。而家美國咁囂張,好快就會見到貨幣秩序被重新界定。
美國向中國發動貿易戰,對中國經濟已構成影響,製造業急速萎縮,可以撤離嘅廠房全部走晒,唔能夠走嘅廠房唯有倒閉。就算將來貿易戰傾掂數,再冇關稅,走咗嘅廠係唔會回巢,倒閉咗嘅亦唔會翻生。除非中國有其他行業頂替呢啲消失咗嘅工業,否則總有經濟損失、工人失業。
當年《廣場協議》簽訂之後,日圓要升值,都係因為美日貿赤嚴重,那時日本面對嘅情況冇今日中國咁嚴峻,日本周邊亦沒有咁多低成本工廠競爭對手。如今中國廠商要搬,佢哋有大把選擇。
關稅會令美國消費品加價,美國人同樣受害?到一兩年之後,由越南、柬埔寨製造嘅產品就可以取代。台灣鴻海集團都在美國威斯康星州設廠,將來iPhone都係由美國製造,貿易戰改寫了全世界嘅經濟布局,土耳其遇到嘅只係剛剛開始。
訂戶登入
下一篇: | 世界愈亂 美債愈升 |
上一篇: | 「滬港通」及「深港通」上周收市統計 |