2018年7月25日
2008年中國嘅三聚氰胺奶粉事件震驚全球,好多食咗三鹿集團奶粉嘅BB,發現患有腎結石。由於問題奶粉營養成分嚴重不足,唔單止造成超過10名嬰兒喪生,更產生咗接近200個大頭娃娃,呢啲BB嘅生命跟未來,除了心酸還是心酸。10年過去,呢批大頭娃娃目前情況已再無人跟進,但呢兩日又竟然又爆出黑心疫苗,再一次震驚中外。
龍頭企業劣跡斑斑
內地疫苗業界龍頭民企長生生物,先後被揭發瘋狗症疫苗造假,以及百白破疫苗(即百日咳、白喉、破傷風三合一疫苗)不符規定被處罰。除咗長生生物之外,湖北武漢生物製品研究所生產嘅百白破疫苗亦唔符合註冊標準,數量約40萬支,其中河北超過14萬人注射咗不合格疫苗。
另外,山東省疾控中心透露,長生生物共有逾25萬支不合格百白破疫苗,分別流入濟南、日照等8市,共約21.5萬名兒童接種疫苗。幸而接種疫苗嘅小朋友,打針後出現異常反應未見增加,但內地家長擔憂事件愈演愈烈。
較早前內地一套名為《我不是藥神》嘅電影火紅熱爆,電影裏將天價抗癌藥的責任,推晒畀瑞士製藥公司,病者無選擇地被外資企業宰割,要有命,就破產。難道中國泱泱大國,就冇呢個本事自己生產抗癌藥?阿Man呢個疑惑,剛好呢兩日有答案,即使中國花費多年時間,重金打造疫苗產業鏈,但黑心疫苗爆出,答案清晰不過,就算進口藥品再貴,都係要用進口貨穩陣。
其實出問題嘅疫苗唔係乜嘢高科技藥物,生產商只要按照配方標準生產、儲存同運輸,基本上萬無一失。
至於有關細節,相關部門亦早有按照規定進行檢驗,為安全把關,而相關《疫苗流通和接種預防管理條例》亦早於2005年6月1日實施。可惜嘅係,生產商為謀取暴利,有法不依,而有關部門有否嚴厲執法,以及違法者有否被追究,就係造成今次黑心疫苗事件嘅根本原因。
其實疫苗製造商長生生物本來就劣跡斑斑,喺今次呢批問題瘋狗症疫苗出事之前,去年10月已因為百白破疫苗被立案調查。而該公司喺2012年上市時,也曾被爆造假數據,跟經銷商山東兆信打過官司。
奇就奇在一間咁多黑豬印記嘅公司,竟然可成為疫苗生產商龍頭,十幾億人口嘅性命安危,竟繫於一間如此低質嘅民企;加上去年百白破疫苗事件並唔係芝麻綠豆嘅小事,問題批次疫苗數目高達65萬支,且已經流通市面,最後呢件事只係罰咗344萬元(人民幣.下同),無人依法被捕,公司更大模廝樣繼續生產,做其吸血魔鬼,透過呢啲問題疫苗大撈特撈。
民企規管嚴重缺失
睇番長生生物盤數,集團喺2017年銷售費用高達5.83億元,公司只有25個銷售人員,即係一個Sales嘅銷售費高達2330萬元,確實高得出奇。不少報道已指出,公司原來喺疫苗銷售過程中可能涉及行賄,給回扣予地方醫院、疾病防疫部門以推銷其產品。一間民企劣績斑斑,不受規管,穩坐其龍頭寶座,究竟係因為違法而不受嚴懲,抑或根本無人執法?
內地媽媽為保護孩子,已經要四處張羅進口奶粉,但疫苗根本無可能代購或網購,唔通媽媽要帶埋BB出境打疫苗,再一次「威」出國際?無論係10年前嘅毒奶事件,抑或今天嘅黑心疫苗,都反映內地喺規管民企方面嚴重缺失,尤其係有關藥物及食品安全,足以影響每一個中國人民。如此重要嘅必需品,中國仍要靠進口,仲講咩科技產品自給自足、中國製造2025!
麥狄文(徐狄怡.證監會持牌人)
放大圖片 / 顯示原圖
訂戶登入