2018年7月11日
上月底阿Man曾撰文指小米(01810)質地麻麻,就算上市煮成熟飯,亦無乜人願食,卒之小米唔單止縮減集資規模,由年初傳聞集資額最少100億美元,縮減至正式招股時嘅371億至480億港元,最終以下限定價,即集資額不足400億港元屈就上市,趕及喺7月份掛牌,成為港交所(00388)首隻同股不同權上市股份,「犧牲」六成集資額亦都在所不計。
財爺護航 隨時淪為話柄
既然小米咁「大方」肯縮水上市,港交所亦禮尚往來,畀足面小米,單係上市儀式出動直徑1.8米嘅新銅鑼,較平常上市儀式敲嘅普通版銅鑼相比,氣派已高人一等,果然係「同股不同鑼」。
唔單止上市敲隻鑼大過人,連同日上市嘅另一創板公司紫元元(08223),都不能像以往多間公司同日上市般,可以齊齊喺大堂同場同敲,紫元元需要讓路往外邊接近IFC後門位置嘅敲鑼場地進行儀式,更突顯小米作為首間同股不同權公司,確係擁有特權。
不過人哋小米講緊市值以千億計算,又係首間同股不同權嘅獨角獸公司來港上市,即使招股期間市場反應麻麻,上市首日掛牌破底,上市儀式仍獲得多位達官貴人站台,包括我哋港交所舵手小加同志、港交所大家姐史美倫,仲有財爺波叔等。阿Man最吃驚嘅係,作為財爺嘅波叔,以其身份談論整體經濟跟市況都冇問題,但開腔談論小米股價,似乎唔多恰當。
噚日上市儀式後,有記者訪問財爺,指小米掛牌首日即破底,係咪反映市場唔多接受同股不同權架構,財爺竟然出言撐小米,呼籲投資者唔需要為短期波動而擔心。
好老實講,上市翌日股價回升當然好哋哋,相反股價再向深海出發潛深啲,佢呢番叫人唔使擔心嘅言論,有可能淪為話柄,被指不負責任。
中證監防股民貴買獨角獸
小米噚日股價回升,多得恒指服務公司背後發功,於周一收市後公布,將小米納入恒生綜合指數,皆因小米符合快速納入指數規則嘅要求,並於本月23日起生效。
小米喺上市後10個交易日後被納入恒生綜合指數,創下港股最快紀錄,而成為綜合指數成員,意味着小米將合資格成為互聯互通機制「港股通」可買賣股份。
有缸邊友講笑話,中證監對於小米CDR申請無意鬆章,正正係為咗確保內地股民避免高價買入獨角獸,唔想股民損手,總算為內地股民盡責把關。但香港呢邊唔單止對小米上市審批手鬆鬆,上市後更快快手推佢去「港股通」,果然係想做到中港融合,兩地股民貴股齊齊買,有錢齊齊賺。雖然「港股通」最終仍要獲中證監批准,但暫時搵唔到一個理由唔放行小米納入「港股通」。
特首嘅寶貝仔喺小米打工,碰巧小米作為首隻同股不同權股嘅IPO獲開方便之門,坊間已惹起不少流言,掛牌當天又獲財爺開口護航,容易令人有錯覺,官家在公開撐小米股價。
小米招股風險水蛇春咁長,加上任何投資都有風險,以財爺的身份實應該慎言。
麥狄文(徐狄怡.證監會持牌人)
訂戶登入
下一篇: | 藥神創造股王 |
上一篇: | 加密幣卡瞄準500萬用戶 |