甘比炒恒大明蝕暗賺

曾叱吒一時嘅股壇狙擊手大劉，雖然近年因健康問題，未有好似以前咁活躍於股壇，但唔代表唔玩股票，去年華置（00127）多次增持恒大（03333）就成為一時佳話。以舊年年底最後一個交易日恒大嘅收市價計算，當時華置持有嘅恒大股份，一度為華置帶嚟近百億元嘅公平值變動未變現收益。

單係2017年度，華置一共買入近8.58億股恒大股份，總代價係132億元，而去年底年結時，就錄得97億元未變現收益，炒股炒出近百億元賬面盈利，又一次印證大劉確係高手。

可惜好景不常，自今年1月港股創下歷史新高33484點，而恒大卻無復見去年10月高位後，恒大股價亦隨大市每況愈下。至上周更見過18.18元2018年低位，而華置大股東甘比，即現任劉太個人持股，連同透過華置持有嘅恒大股權，更要由賺變蝕。不過，恒大呢兩日反彈重上20元水平，甘比持股又由蝕變賺，但同去年底華置賺近百億元相比，賬面利潤足足蒸發咗九成。

睇番華置喺今年4月嘅公告披露，劉太曾斥資51億元購入恒大股份，持股量約1.49%，而平均價每股要25.95元，即係恒大股價高位時，劉太賬面最多賺接近13億元。不過，若然持股量一直無變，如今每股接近蝕5元，一來一回條數都咪話唔襟計。

高位沒及時走貨

至於劉太持有約五成華置股權，華置入貨價就平好多，約每股15.4元，若然持股量冇變，華置手貨賬面仍賺超過38億元，劉太佔一半，即係透過華置持有嘅恒大，仲有近20億元賬面利潤，拉勻條數兩手貨都仲有贏。

劉太入貨價足足貴過華置入貨價一股十皮有多，而跟恒大歷史高位32.5元相比，又唔算最高位入市，不過，甘比個人持股，何以無喺高位沽貨套現，似乎不似大劉狙擊手作風。其實，今年華置2月公布業績時，已表明港股潛在波動或令恒大股價未能達到滿意吸引水平，公司會考慮變現恒大部分上市股份。但呢幾個月Chok上Chok落，恒大股價喺4月曾見過28.25元，即係華置喺嗰個水平沽貨，每股閒閒哋都贏五成，只係華置一直未有動作。更有華置小股東話，華置持有恒大咁大嚿貨，好難喺市場出貨，若批股，以目前市況亦唔會賣到好價。華置咁多資金鎖住喺恒大股票嗰度，一日唔沽貨，恒大股價升跌都只係賬面數字，無多餘現金係唔會有特別股息派。

或者大家好奇怪，咁多內房股，大劉何以偏偏睇中恒大？唔通大家都係已故彤叔嘅鋤大D兼鬥地主牌局鐵腳，即眾所周知係鋤D地主會成員，就買入恒大股份撐老友。非也，據阿Man了解，2015年恒大以當年破紀錄價125億元向大劉收購華置總部香港美國萬通大廈，大劉當然投桃報李，喺市場掃入恒大股份。而去年當大劉大手掃入恒大股份嘅資料曝光後，恒大股價亦如坐直升機咁升，除咗吸引內地「大媽」透過「港股通」機制掃貨外，香港呢邊亦唔少缸邊友落搭。由於大劉一直未見減持，唔少恒大小股東亦二仔底死跟，一直持貨至今。

表面睇劉太所持恒大股份賬面蝕近10億元，但透過華置持股除笨有精，扣埋個人持股賬面仍有賺近10億元，只係左袋跟右袋兩條數。加上華置早於2015年以過百億元出售總部物業畀恒大，加埋華置出售畀恒大嘅內地物業，華置足足喺恒大手上收咗170億元，劉太所持股份賬面蝕嗰區區10億元，又算得上乜嘢數。

數嚟數去，最蝕底又係華置班小股東，恒大股份上漲，賬面利潤只係蜑家雞見水，只要華置一日仍持有恒大股份，都咪使旨意有特別股息落袋。

麥狄文（徐狄怡．證監會持牌人）