熱門:

2018年6月26日

方卓如 方如玉帥

即將一次財富大洗牌

6月份恒指由高位跌超過2500點,將近跌去一成,美國總統特朗普用全球財富做籌碼,迫貿易國家就範,主要對手中國的股市固然冇運行,美股都唔見得受惠貿易戰。呢招係七傷拳,傷到人又傷到自己,睇吓邊個瞓低先。

以股市計,中國唔怕跌,因為有「國家隊」支持,由券商到上市公司都要聽指揮棒,要頂住股市是可以的,輸嘅錢由全國富人分擔;美國股市是民脂民膏,是國民財富所在。過去10年股市好景,企業嘅錢多到沒有出路,只能回購,所以美國底厚,股市有跌嘅本錢。

以滙率計,人民幣逐漸貶值,對抗關稅,同時要防範資金外流。資本管制未來會愈收愈緊,否則外滙儲備大減,人民幣貶值會失控;美元會愈走愈強,全世界只得佢有本錢不斷加息,而且資金陸續從新興市場回流美國,負債沉重國家嘅貨幣貶值得更快。美元強不利出口,但關稅呢招令全世界出口都冇運行,全世界一齊攬炒,一齊買貴貨,多敗俱傷。

經濟增長方面,美國繼續以科技做火車頭,經濟活力未停過。中國新四大發明之中的手機支付、共享單車,一睇就知出國創滙能力欠奉,那有國家肯綁信用卡到微信支付?邊個城市願意滿街「殭屍單車」?

中國唔能夠用科技出口,只能夠用基建輸出過剩產能,但基建往往涉及巨額融資,回報少、回報期長,絕對比不上靠食腦創滙嘅爆發力。

一句講晒,股市、滙率、經濟增長三大籌碼,美國都夠晒厚,唔怕同任何一國打消耗戰。佢要打貿易戰,當美國人要開始勒緊褲頭慳啲使時,其他國家已經捱緊餓,食緊樹皮。全世界而家只有美國底厚,只有佢借人錢嘅同時冇人催佢還錢。

貿易戰動真格隨時拖冧全世界,美國則獨善其身,到時多印出來嘅銀紙,又可以出嚟撈底,進一步拉闊貧富懸殊。每次經濟循環都造就財富大洗牌,你而家要做嘅係保留實力,準備下一次循環做撈底嗰個。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads