杜絕殼股不如設恒常機制監管

上期阿Man講過，監管機構對於啲非持牌人士涉嫌違規及違法，好似冇王管咁款，不過對於持牌人士同上市公司嘅不合法行為，當然嚴打。就算未去到違規，對於踩鋼線行為，監管機構一樣睇到實，呢期就講到明要打擊殼股買賣，即係對於back door listing行為唔多贊成。

港交所三招趕絕違規

剛剛港交所（00388）嘅集團監管事務總監兼上市科主管戴林瀚預期，本月尾或下月初會發表有關借殼上市諮詢文件，有意利用三招去打擊買賣公司上市地位嘅活動，簡單嚟講，就係打擊買賣殼股活動。

三招建議包括收緊現金公司嘅定義，反正公司得番現金，仲要上市地位把鬼；仲有係規定公司必須維持足夠業務「及」資產，業務都唔經營，仲要資產又冇，債亦唔慌會有，倒不如取消其上市地位，擺明杜絕靚殼交收正負零；最後一樣係收緊反向收購規則（Reverse Take Over）RTO，唔畀你啲友仔吓吓借殼注入業務走後門上市，新舊殼主想拍住拖分段交收隻殼一樣無得傾。

雖然港交所指殼股買賣活動只佔整體市場一小部分，但引起投機交投以及市場操縱又確係事實。睇番近呢三年嘅啤殼公司愈來愈多，特別係建築殼更加充斥主板及創板。

建築板塊成重災區

講到近年最出名嘅建築殼股，有翠如BB之稱嘅聯旺（08217）可以話名氣盛極一時，而其股價走勢及控股變動，更活脫脫係一間上市公司，由啤殼到賣殼嘅過程。阿Man喺兩年前亦曾經喺本欄品題有關啤殼流程，甚至係殼花買賣，而聯旺上市之初，圈內人亦心知肚明，又係另一個啤殼賣殼花的故事。

上市公司集資，利用平台籌錢，再把業務做大做強，本來就係上市最原始嘅用意。但近年內地唔少企業為咗繞過上市審批，透過買入香港嘅上市公司再注入業務借殼，盡快取得喺香港股市嘅上市地位的情況愈見普遍。唔少上市公司掛牌多年後，股份交投疏落，令上市地位失去再融資功能，倒不如把心一橫，把上市地位賣出，而近年喺市場需求有增無減之下，殼公司嘅價格確見顯著上升。

正正因為殼公司有價有市，衍生出專業啤殼呢個行業，更締造一個三贏局面，包括有合資格業務可上市公司、需要透過走後門盡快上市嘅內地企業，以及一班專業幫人搞上市嘅財務顧問團隊，透過啤殼、買賣殼而爽撈一筆。

禁「圍飛作歹」更實際

不過呢幾年監管機構一路收緊，但殼價卻節節上升，原因係對應「殼股買賣」嘅條例一再收緊，令最終真正符合「殼股」資格的上市公司「殼」，無論主板、創業板都愈來愈少，但市場需求卻未有下降，供需失衡下，殼價只有愈舞愈高，有價有市。正因為殼股有價，啤殼集團索性利用GEM上市門檻較低之便啤殼賣殼花；監管機構亦只有移船就磡，提高兩板的上市門檻，或加緊審批尺度，變相令上市資格提高及審批時間更長。惡性循環之下，更多有意來港上市嘅企業，便轉向尋求借殼上市之路。

其實對於一部分股價長期低迷、交投疏落、唔生唔死嘅上市公司嚟講，控股權易手，新股東注入更有前景嘅業務及資產，對於小股東嚟講未嘗唔係好事。

與其杜絕所有買賣殼活動，倒不如設立一個恒常監管機制，把相關活動納入常規監管下，甚至喺上市條例作修訂，以及加強管制「圍飛作歹」嘅行為，總好過把所有買賣殼活動一刀切。

麥狄文（徐狄怡．證監會持牌人）