2018年6月13日

麥狄文 金融街密語

非持牌人真係冇王管？

證監會一向對持牌人士監管嚴謹，只要持牌人士稍有行差踏錯，一旦被揭發，證監會懲戒犯錯持牌人毫不手軟，通常會以罰款、暫停牌照，甚至永久釘牌作小懲大戒；當然違規者涉及刑事罪行的話，將轉介警方商業罪案調查科或廉政公署處理，查明真相後再交由法庭裁決。

對於持牌人士，證監會當然嚴格規管，而大部分持牌人，包括阿Man在內，大多規行矩步、奉公守法。

不過對於唔少非持牌人士，免費提供投資資訊當然無可厚非，都係信不信由你，接收資訊跟投資者最終決定，當然係自己盤數自己計，投資者本身要負上責任。但收費提供相關資訊，甚至為投資者代為投資，而又未有領有合規牌照，究竟算唔算違規，證監又如何監管以避免有投資者蒙受損失，似乎暫時未有清晰指引，莫非唔係持牌人就冇王管？

交錢代投資 隨時渣都冇

最近阿Man就聽聞有某某網誌作家，因為收取高昂學費開班授徒，甚至收取學生資金代其投資，跟學員發生糾紛，而被部分學員去信證監舉報；至於證監有否就此展開調查，當然不得而知。

而呢個作家，之前亦有喺唔同平台甚至報紙專欄發表文章，只係愈來愈多人懷疑其買賣紀錄有造假之嫌，唔少平台亦收到大量讀者投訴後從善如流，開始取消刊登其文章。

不過由於作家開始薄有名氣，一直利用社交平台開live做節目，或發表文章以作招徠，除咗開班授徒學費高昂之外，亦設有收費通訊群組，提供即市操作貼士服務。

本來開辦投資課程收學生賺錢又好，開收費群組畀即市投資策略為賺錢都好，呢啲數目有限，唔應該搞到有人要告狀告到證監咁大件事。不過據聞該名網誌作家變身投資顧問甚至基金經理咁款，收埋人錢替人做投資，咁就出事喇……皆因呢個世界唔少人以為，交得畀所謂「專家」做投資，奉旨穩賺不賠，結果事與願違，當然就唔忿氣，變身苦主去信證監會投訴，要求討回公道。

讀進修課程 打好基本功

其實隨便將錢交畀唔受證監會規管嘅非持牌人士或公司，真係隨時渣都冇，雙方未有簽署任何文件，而投資風險亦未有訂明，上述苦主想討回損失，似乎有啲難度，除非有證據顯示收款人有心詐騙，若然喺你情我願嘅情況下過數，追唔追得番筆錢係成疑問。

對於坊間五花八門嘅投資課程，舉辦課程既有持牌人士，亦有非持牌人士，對於舉辧投資課程嘅導師資格，其實係無一定準則，只係視乎導師受歡迎程度，當中有財演、基金經理、KOL、職業炒家等等，只要夠號召力，自然客似雲來。但有心了解投資市場，學習投資技巧，究竟要點樣選擇，實在係眼花繚亂。

阿Man認為，與其盲從追捧所謂「明星投資專家」，不如報讀由大學或政府認可機構舉辦嘅進修課程，嗱……唔好搞錯，係進修課程，而唔係僅借大學之名搞嘅講座。用心學習，再累積實戰經驗，點都會學到一技傍身。

另一方面，想成為投資高手，一定要勤力做功課，例如關心所投資公司嘅業務發展、業績財務報表、相關通告等等，都要靠自己多做功課。咪諗住吓吓靠人畀冧巴，又或者聽人哋嘅投資策略建議，始終自己唔打好基本功，靠其他人好難獲得理想投資成績。若然真係完全唔想學，又或者無時間親自理財，倒不如幫襯合法合規嘅資產管理公司，搵持牌基金經理或投資組合經理代勞，亦可考慮買合規管基金。阿Man經常強調，呢個世界唔會有免費午餐，既無不勞而獲，亦無一步登天，更加唔會有蛤乸周街跳。

麥狄文（徐狄怡．證監會持牌人）

下一篇：	意債危機不能掉以輕心
上一篇：	你我他投資弱點 如何取長補短