熱門:

2018年6月5日

方卓如 方如玉帥

空置稅同樣係幫唔到市民上車

恒生指數昨天收報30997點,升505點,成交額1035億元。大市可以跌500點,又可以升500點,就好似C朗踢波一樣,忽左忽右,你根本唔知道佢要走往哪個方向。上落市其實最好賭,升破31000就沽,跌穿30000就買返,來來回回,夠膽落注就得。

唔止香港,全世界主要股市都係點咗穴,又唔冧又唔升。要突破呢個情況,要有一些夠力嘅事件出現,譬如以前次按爆煲、狂印銀紙、大幅減稅,諸如此類。

但可見將來,又唔見有什麼端倪,會有刺激市場事件出現。這種全球上落市嘅格局,還會持續一段時間。

政府話開徵一手樓物業空置稅嘅研究接近尾聲,快將公布。空置稅會否推冧樓價?而家唔會有答案,話會嘅人都係呃你,因為都未知稅率有幾重。如果係幾巴仙,一年升幅都唔止,發展商坐貨慢慢賣,再計入稅款賣畀你都得,到時候樓價只會更貴。

稅率太高,發展商就慢慢起樓,樓花賣咗,預計關鍵日期都可以延期,地盤罷工就可以,到時就可以延長要畀辣稅嘅時限。

面對重稅,發展商一定要識用計仔。即係話,空置稅無論是輕是重,受害嘅都係買樓嘅業主,唔會令發展商入肉。

萬一空置稅真係推冧樓價,業主仲傷,尤其是利用呼吸Plan買樓嘅業主。在樓價下跌嘅環境,佢哋係無辦法搵銀行做按揭,逼住要捱貴息輸畀發展商。樓價下跌,佢哋想賣樓止蝕都唔得,因為發展商會用更平嘅價錢搶先賣樓。空置稅如果真正達到推冧樓價嘅目的,結果最受害嘅係剛剛夠錢上車嘅市民。

要明白,發展商手上嘅空置單位,既然可以留喺手唔賣,證明是有足夠坐貨能力。所有空置單位只有愈賣愈貴,未賣嘅單位同市價比較全部都已經有豐厚利潤,兩個月前天璽貨尾出售,比3年前開價貴35%。要有幾高嘅空置稅率,先會令發展商急於將呢啲厚利單位出售?歷史證明,辣招無助市民上車,只會扭曲市場。空置稅同樣唔會幫到市民上車,結果只會令市民辛苦,問題係如何辛苦。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads