《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年5月30日
上星期五，五洲國際（01369）一個上晝暴跌近九成，市值由本來廿幾億蒸發得至上周停牌前嘅3.39億元，導火線係內地媒體《國際金融報》早前爆料，指五洲國際存在嚴重圈錢問題，而公司主席兼董事，就喺事前多次減持股份。本來《國際金融報》唔算好多人睇，呢個消息本可神不知、鬼不覺。不過五洲國際喺報道刊出3日之後，即其股價大插前一日，晨咁早喺公司官方網站發聲明，表示要對《國際金融報》失實報道採取法律行動。一單本來無乜人知嘅負面新聞，由上市公司自己爆料通天，都算係唔衰攞嚟衰。
回一回帶睇吓五洲國際爆煲，其實早有跡可尋，皆因3月中嘅時候，中江國際信託責任公司發行嘅「中江信託——金鶴287號無錫五洲貸款集合資金信託計劃」，通過郵寄文件方式向投資者宣布違約。至3月底，中江信託官網先正式披露有關287號產品訊息，而呢個產品融資方正正係五洲國際。詼諧嘅係，五洲國際竟然澄清，話公司係香港上市公司，因為要發布2017年度財務報表問題，所以唔可以喺協議期內兌付，經過協商後把兌付日期延至3月31日，287號產品並未有違約。
換完核數師 主席減持
不過最令人懷疑嘅係，公司發布2017年財務報表之前，表示因為跟前核數師因為審核費用講唔掂數，今年2月初換走咗安永，轉去用另一核數師立信德豪，一間係Big 4，另一間係專幫細價股核數嘅熱門核數師，而五洲所慳到嘅核數費連一成都唔夠，為乜事換核數師，大家心照不宣。核數費慳唔到幾多，最搞嘢係立信德豪喺五洲國際3月29日公布嘅2017年度業績，竟然都要保留意見。
通常一間上市公司換核數師，投資者已經要響起警號，整份財務報表，核數師話保留意見，小股東應心中有數。若然呢個時候小股東仍未察覺五洲國際嘅問題，咁大股東喺4月初開始多次減持股份，實在係公司出事前另一個大警報。大股東雖然僅套現247萬港元，但竟然要分開21次方能累計減持393萬股，可想而知五洲國際股份日均流通量簡直少得可憐。
五洲國際嘅致命傷，係2017年開始長期借貸規模迅速下降，千祈唔好誤會係減咗債，同時間短期借貸規模大幅上升，財務費用亦迅速增至8.14億元，莫講話公司未能以長債冚長債，咁搞法2018年連利息畀唔畀得起也成疑問。如此一來，3月有關287號產品係因為要配合年結，抑或其他原因還唔到息，講多無謂，等公司再發通告解畫，反正股價放量暴跌，股份通常係被斬倉洗倉，大股東或公司股份有冇抵押，大家坐定定等睇戲。
其實五洲呢件事只係冰山一角，2008年金融海嘯後，中國曾推行4萬億元放水計劃，令中國經濟維持一定增長，喺寬鬆大環境之下，企業要度水易過借火，借貸成本低到令生意人覺得唔槓桿一下就笨。
阿爺去槓桿 債券違約湧現
但經過咗十年八載之後，槓桿都透過房地產市場推到一般市民用家身上，而人仔又未有國際轉移槓桿能力，領導人怕槓桿持續，一旦泡沫爆破，2008年海嘯重演，但主角由美國變中國，所以自去年起積極及以強大力度去槓桿。呢個亦係點解由舊年開始，唔少企業長債無法再延期，要以較高借貸成本嘅短債去冚長債；再加上阿爺落晒柯打，銀行及金融機構唔可以再放肆地發行過多信貸融資產品，市場流動性自然大減。
阿Man可以預期，中國喺去槓桿加速，收縮周期之下，今明兩年或迎來債務違約高峰期，無論如五洲國際嘅一般民企，抑或巨無霸級企業，甚至央企國企，以至地方政府，都有機會面對違約風險。今年以嚟，滬深交易所已有69隻債券宣布違約，涉及59間公司。最恐怖係呢69隻違約債券，竟有37隻係今年4月之後出現，睇情況今年餘下日子，將會有更多上市公司違約事件發生，而五洲國際嘅故事，一定唔係最後一個。
麥狄文（徐狄怡．證監會持牌人）
放大圖片 / 顯示原圖
放大圖片 / 顯示原圖
訂戶登入
| 下一篇： | 新興市場資本外流敏感 |
| 上一篇： | 開始小注部署短線淡倉 |
