《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年5月3日
唔經唔覺2018年已踏入第5個月份，港股今年開始進入不平凡嘅一年，1月暴升，2月暴跌，3月及4月份忽升忽跌，大市隨住每日幻變嘅消息上落，令唔少缸邊友開始迷失方向。正正因為魚缸太多迷途小羔羊，眾多投資諮詢平台、社交網頁或通訊群組應運而生，當中有收費或免費，內容都係離唔開投資心得、買賣貼士，又或者即市操作指導等等。
正因為呢類平台愈開愈多，缸邊友亦養成睇blog，或參考社交平台貼士炒股嘅習慣，唔少莊家睇中呢一點，開始利用相關工具散播消息，以方便引人落疊兼散貨。
唔知大家有冇留意微信安全中心最近發布有關規範微信個人賬號發布投資建議，以及「薦股」相關報務訊息通告。呢份通告表示，截至目前通過用戶舉報數據，核實確認對120幾個微信群組進行限制群組功能處理，亦同時對超過1100個微信賬號進行限制功能，使用或限制登錄等階梯式處罰。
薦股分紅 收諮詢年費
微信安全中心表示，呢類推薦股類欺詐，通過偽造所謂內幕消息同埋行情分析，誘騙用戶參與投資。其實呢類微信群組都係捉心理，大部分散戶都係抱住不勞而獲心態，難得有貼士提供，當然係食得唔好嘥。而騙徒正正係睇中散戶弱點，透過微信群組提供所謂「貼士」，所推薦股份上升，就向群組成員分紅或收費，相反推薦股份下跌，拍吓籮柚走人，唔需要負任何責任。
微信安全中心稱，呢種欺詐牟利模式，嚴重損害用戶利益，國家對呢類行為已明令禁止。該中心講緊嘅，係針對A股嘅投資諮詢群組，通常以所謂分析師或專家作招徠，收費群組一般提供買賣貼士及諮詢服務，收費由幾千蚊一年到幾萬蚊一年不等。
其實唔少微信群組所針對嘅係港股散戶，通常呢類群組都會用美女頭像作招徠，不斷向陌生人要求加入朋友圈，唔少人因為好奇而接受交友邀請。「美女」成功獲加為朋友後，先會跟事主傾談一吓炒股心得，初時可能講吓大市行情，混熟後開始交換個股情報，其後成立群組，游說事主邀請其他朋友加入群組，待群組有番咁上下人數，講緊過百個用戶左右，戲肉就會上演。
內幕假消息 呃買股仔
群組「美女」通常會話收到內幕消息，多數係話叔叔呀，伯父等係某公司高層，指出某上市公司，十居其九係創業板，將會有大動作，建議買入8字頭股份。
起初該股確會上升，組員初嘗甜頭，待成交開始增加，「美女」會建議加重注碼，指好消息快要公布。故事發展到呢度，大家當然會知道結果，就係該創板股價之後一瀉如注，跟進買入嘅組員當然損失慘重，而呢個時候「美女」就會喺群組消失得無影無蹤。
阿Man想講嘅係，無論投資又好，投機又好，想喺市場生存，莫講話要做長勝將軍，成為高人，僅僅想站得住腳，搵番兩餐，做功課係基本條件，呢個世界邊有咁多免費午餐又或不勞而獲，蛤乸亦唔會隨街跳。
所謂嘅內幕消息，絕密猛料，可以話全部係糖衣毒藥，大部分係山埃貼士。而社交平台交友亦陷阱處處，不法之徒利用社交平台散貨，都係願者上釣，上當者通常心存僥幸，最終搞到損手爛腳，怨天尤人，從來唔反省自己因為貪心貪方便，以為股票市場好易有錢執，呢種散戶，正正係莊家大戶眼中嘅肥美點心。
麥狄文（徐狄怡．證監會持牌人）
訂戶登入
| 下一篇： | 動力仍不足 資金炒內需 |
| 上一篇： | 銅金比率看前景 債息小回股稍升 |
