熱門:

2018年4月11日

麥狄文 金融街密語

時勢造英雄 十年黃金非爛銅

剛剛過去嘅周日,有幸獲呢期中環金融圈人氣急升嘅術數玄學測市專家陳弋航(七哥)邀請出席金商萬鑾國際嘅十周年晚宴。本來阿Man一向對出席呢類event興趣不大,而金商非券商,更加開唔正阿Man嗰瓣,但七哥叫到,兼且萬鑾老闆同埋舵手又係阿Man前輩,當然要抽時間出席。

其實,出席今次晚宴,阿Man另有私心,皆因該公司難得搵到四大天王嘅「阿王」郭富城做代言人,得知天王亦會出席晚宴,梗係想一睹其風采之餘,搵個機會集一集郵。

美元主導後交投淡

可惜,當晚郭天王冇開金口唱首本名曲,反而講咗一個關於自己同金業嘅故仔,至於故仔內容,當晚已見有娛樂新聞報道,阿Man唔再重複。宴會上例牌播放郭天王為萬鑾拍嘅廣告,而且仲有廣告以外嘅拍攝花絮,阿Man亦把握機會跟阿王合照,成功集郵,總算滿足了我呢個小粉絲。公司為咗答謝郭天王出任代言人,邀請七哥贈予墨寶,以足金絹題上「豐收」二字,寓意豐收年年!其實七哥除咗係出色嘅術數測市專家,亦精於國畫及書法,稱得上係金融圈才子。

雖然郭天王未有大開金口,但主辦單位都算大手筆,重金禮聘郭天王做代言人之外,晚宴亦搵到靚聲歌手蘇永康表演,以及南韓女團載歌載舞,兼且設有獎遊戲同抽獎,獎金獎品出手闊綽,嘉賓都盡興而歸。睇得出萬鑾國際呢個十周年晚會花費不菲,公司重視十周年紀念之餘,亦反映應該搵到唔少錢,否則亦唔會搞個晚宴大灑金錢,而金銀貿易場嘅行家跟前輩亦相當畀面出席,可見萬鑾喺金商中,應有一定江湖地位。

記得我哋呢一輩投身金融行業之初,經常聽見「十年黃金變爛銅」呢句話,皆因黃金呢種貴金屬,價格由八十年代至千禧年期間一直下跌,由高位計蒸發一半,尤其無咗金本位,以美元主導之後,黃金確係唔多值錢。阿Man入行嗰陣,當然講緊千禧年之前嘅事,仲喺友報投資版爬緊格仔,當時有一個關於黃金白銀嘅投資專欄,負責執筆嘅同事每日大概要交400字左右嘅稿,記憶所及,當年嗰位同事每日為咗呢400字,可謂絞盡腦汁,為咗搞掂呢篇稿,往往比佢完成另一篇800字關於炒期指嘅文章,花出雙倍時間,原因係當時黃金交投淡靜,每日波幅有限,不足1美元嘅上落區間,既無技術走勢可分析,而影響金價嘅相關新聞亦有限,要日復日填滿幾百字專欄,實在係有啲難度。

不過,自從美國發生「9.11」事件之後,黃金又再度發揮其避險功能,而金價亦展開其火箭升空之旅,自2005年底起,由本來每盎斯400至500美元,大幅上漲至2011年歐債危機爆發時嘅歷史高點1923.2美元。黃金價格因為市場避險而上漲,而內地金融市場逐步開放,內地投資者對唔同投資產品均感興趣,商品期貨包括「貴賤」金屬,更加成為內地炒家嘅寵兒,黃金當然唔會例外。

內地投資者成新助力

近呢十幾年,現貨金、期金及紙黃金買賣再度活躍,更出現唔少全職金炒家,而香港金銀貿易場成員亦回復生氣,當中唔少會員好似萬鑾國際,除咗香港市場之外,更把握機會放眼內地,喺前海快速發展。而萬鑾正正係食正條水,喺短短十年間,業務增長驚人,萬鑾更助力提升香港黃金產業鏈競爭力,推動內地跟香港之間黃金交易發展。

所謂時勢造英雄,「十年黃金變爛銅」呢句說話,亦開始消失喺金融圈中……

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads