熱門:

2018年3月29日

方卓如 方如玉帥

連管理層都認為冇投資價值

你話情何以堪?幾多人窮多少心血,使一、兩千萬閒閒地,都搞唔到上市。而毛記(01716),漫不經心,本來無一物,上到市不特止,仲係超購王、賺錢王、升幅王。最令認真上市老闆嘔血嘅係,毛記對上市毫不認真。由非董事發言,佢亂噏都無責任,就算佢話係佢公司促成金正恩訪華,將來股價會受惠於特朗普到訪北韓,都唔使出澄清通告,因為佢邊個都唔係。幻想吓未來毛記業績公布,唔使旨意會有發布會,AGM更加唔會有正經嘢講,股東只可以舉手問點解咁少嘢食。一句公司投資價值都講唔出嘅公司,正如發言人所講,都分析唔到。在公司眼中,真心認為買佢哋股票嘅人,的確係最蠢嘅投資者。香港第一次出現一隻連管理層都認為冇投資價值,只有炒賣價值嘅股票,同ICO冇分別。但同樣係睇得最準嘅投資者,因為冇投資價值嘅股票,唔代表股價不可以升。

其實毛記ICO可能仲適合過IPO。發言人要多謝一直支持毛記嘅觀眾,話佢哋係最蠢但睇得最準嘅投資者。

事實上,一直畀錢支持毛記嘅觀眾,享受唔到毛記上市嘅紅利。反而從來唔睇毛記嘅炒股專家,就賺盡升幾倍嘅利潤。如果毛記發幣唔係發股票,個個支持嘅觀眾都有份,以毛記炒空氣嘅實況,毛記嘅貨幣一樣升值,觀眾因而享受到資本紅利。

還有,以管理層咁藐視投資者嘅態度,ICO最啱,因為毋須面對投資者。唔需要有業績發布會,沒有AGM,ICO眾籌之後,只要繼續有產品推出就冇人嘈。最適合搞ICO嘅公司走去成功IPO,認真搞IPO嘅公司花掉金錢但未能成事,證明現今世代,認真便輸了。

第一季完結之後,大市原地踏步。第二季比第一季仲差,諗唔到有什麼令人興奮嘅場面,反而目前所有嘅發展都係利淡。Facebook、 Twitter、Tesla、Amazon、騰訊(00700),全部慣常製造驚喜嘅公司,而家都正在面對負面消息。貴你唔會買,平你唔敢買,而家係考你膽識同耐性嘅時候。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads