法例存漏洞投資者成騙徒點心

上周六一批懷疑被跨國投資集團行騙的苦主示威，當中約20人拉大隊去灣仔警察總部報案，其後更由立法會議員「元秋姐」安排記招，畀機會苦主申訴。據報道，今次涉案受害者超過2000人，而每名受害人投資金額由數萬至數百萬元不等……嘩，即係呢單騙案涉及金額約10億元，呢個跨國集團真係肥到襪都着唔落。

今次呢單投資騙案，係有人為該跨國集團做中間人，以傳銷方式如微信朋友圈、邀請名人專家出席講座等，並向受害人表示透過投資外滙、海外酒店項目，甚至香蕉園及採礦項目等等，全屬保本項目，訛稱受害人每月可獲6%至8%回報之餘，亦可保本。

其中一名受害人表示，慘劇始於2014年喺微信朋友圈見到有人分享有關投資頂目，亦親身到集團表示有份投資嘅雲頂酒店作實地視察，決定投資50萬元。當然，未成為受害人之前，曾經收取過幾個月回報，但其後要求取回本金，對方當然採取拖字訣；直至去年，集團內部開始唔夾口供，喺一個馬來西亞賣地投資項目上露出馬腳，苦主懷疑「伏已中」，決定報警救助。

阿Man對於呢班苦主真係深表同情，皆因上述受害人曾親身視察投資項目，對自己嘅投資處理態度認真，DD（盡職審查）都做埋亦中伏，可見呢個詐騙集團做戲做全套，啲行騙手法好認真。而集團氹苦主落疊時，仲搬埋啲集體投資、眾籌概念出嚟，實在更易誤導投資者。

盡職審查亦中伏

今次呢單懷疑詐騙，最嚴重嘅地方係受害人並非完全無投資經驗嘅羊生羊太，好大部分係具生意經驗嘅商人、專業人士，甚至連金融界人士都有，可見呢個跨國集團係有備而戰，仲要係「大雞唔食細米」嗰款。雖然有人唔滿意今次元秋姐出嚟抽水，但阿Man則認為秋姐今次說出個重點來，佢表示證監會喺兩年前已得悉事件，但竟然繼續有受害人墮入騙局，即係跟進有問題，甚至係政策有漏洞。

有關呢間投資公司對外集資進行項目投資，由於投資產品未獲證監會批准，曾被證監會入稟法庭頒布凍結資金及禁止牌照執業，但懷疑中間人繼續另開公司重施故伎，咁即係法例上存漏洞，騙徒先有機可乘，投資者任人魚肉，成為騙徒點心。

除咗呢單重量級騙案之外，今年1月亦揭發另一間公司訛稱研發製成高科技「超級尿袋」，更以「高回報、低風險」作招徠，直至該公司人去樓空，騙局始被踢爆。而呢單所謂高科技項目騙案，有關詐騙集團主腦及其助手已被捕，而涉案受害人數目過百，涉款亦達6700萬元。呢單騙案都以高科技項目包裝，更揚言公司將會喺美國上市，同樣以保證回報招徠。

各項非上市投資項目，若然只係透過朋友介紹，一般當然唔可以視作公開集資，但若以社交平台呢啲方式，又或者透過傳銷手法進行，有冇涉及違規，變相公開集資或非法眾籌？希望證監會及有關當局可以認真跟進，以免香港呢個國際金融大都會，成為不法騙徒嘅天堂。

至於投資者進行每一項投資之前，除咗要了解相關投資產品嘅風險，付上血汗錢之前，要停一停，諗一諗，有冇咁大隻蛤乸隨街跳，當投資回報too good to be true，咪以為自己行緊運遇貴人。

麥狄文（徐狄怡．證監會持牌人）