《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年3月19日
承接農曆新年前，高仁撰寫了「蠱惑的唉賓」系列大爆內幕，首先揭露中資「賊投行」引君入甕策略，之後再識破中資「賊投行」在CB的搵食伎倆。各位「巴打」，高仁將於本文繼續進行大踢爆，有關中資「唉賓」在新股包銷的搵食秘技。
在披露對話實錄之前，請各位「巴打」重溫人物背景，簡介如下：
戴孤劃──又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東；
程更計──本地證券行經紀兼財務顧問，除了招呼散戶之外，亦向上市公司出謀獻計；
鍾國通──中資投行「唉賓架」，熟悉中國國情。
高 仁：戴Sir、阿程，我為你哋介紹一吓，呢位係中資投行「唉賓架」鍾國通。
戴孤劃：啱晒嘞！我哋正討論緊，近年唔少內地企業來港上市，中資投行都爭崩頭去攞「刁」，例如有3家中資投行順利入圍做pitching，投行B同C都係以低價搶「刁」，投行A無奈以更低價接咗單job，但到底點樣賺錢呢？
低價接IPO「刁」冇錢賺
程更計：而家「唉賓」做IPO「刁」嘅競爭相當激烈，即使好彩做到保薦或者包銷都未必會賺到好多錢，仲可能未必攞到之後做配股、交易嘅回頭單。
鍾國通：為咗提高自己喺單「刁」嘅利潤，投行A一定要使出蠱惑招數，就係叫研究部同事俾隻新股一個sell嘅評級。
高 仁：各位「巴打」要知道，在研究評級嘅世界裏面，strong buy等同於buy，buy即係hold，hold代表sell，sell其實係strong sell，即係叫大家索性唔好買呢隻新股。
戴孤劃：投行A咁大整蠱，新股公司一定會鬧爆啦！
鍾國通：鬧爆都冇用，投行A嘅「唉賓」會解釋佢哋內部有「防火牆」，IBD（Investment Banking Department，投資銀行部）同研究部係獨立運作，佢哋都控制唔到。
上調評級高價沽貨
程更計：哈哈！新股公司嘅老闆梗係冇睇到高仁嘅專欄，新股公司會被視作為「產品」出售，「芬佬」係「產品」嘅「收買佬」，「唉賓」就係「產品」嘅「大sales」，投行入面嘅研究部當然係support「唉賓」做銷售（詳見2011年4月〈揭露「唉賓架」搵客秘技〉文章）。
高 仁：阿程，咁耐你都記得，厲害、厲害！我相信，投行A知道手頭上隻新股係好嘢嚟，但想一次過賺得deep the pocket一啲啫。
鍾國通：冇錯！投行A嘅「唉賓」會同老闆講，公司嘅股票有可能會賣唔出，佢哋願意全數包銷晒啲股票，當然係以低價買入啦。接貨後，研究部就會轉軚發出strong buy嘅評級，令投行A轉過頭就可以賣晒啲股票俾「芬佬」。
戴孤劃：嘩！除咗雞碎咁多嘅包銷佣金之外，投行A咪可以賺晒股價升幅嘅差價囉！
高 仁：戴Sir，你講得啱呀！呢個故事教訓各位新股公司嘅老闆，搵投行做上市保薦或者包銷，永遠係揀選兩間或以上好過一間。中資「唉賓」仲有其他呃民企老闆嘅蠱惑招數，不如等鍾國通飲啖茶、食個包，一陣再講啦！
「蠱惑的唉賓」系列．之三
本欄逢周一刊出
如想與高仁交流上市公司的財技個案及招數，請電郵至[email protected]。
訂戶登入
