熱門:

2018年2月28日

麥狄文 金融街密語

瑞房私有化兒戲股東氣頂

經過2月初大市一輪深度調整,踏入月中以後,港股在30000點樓下低位開始反彈,雖然暫仍未能重納升軌,但至少已脫離之前大幅下跌嘅危險期。市況喘定,除咗對新股集資有利之外,對於上市公司發債或批股集資氣氛亦利好,瑞安房地產(00272)剛完成發債集資,股價則未對發債有太大反應。

口痕友話瑞房發債竟然有人落疊,都算係咁,皆因集團喺1月底大市處於33000點水平時,一度醞釀私有化,江湖當時盛傳上海姑爺跟多個banker密密斟,尋求融資為潛在私有化計劃作出準備,須籌旗30億美元,折合約234億港元,搵banker「度水」係必經過程。

有關私有化傳聞,瑞房曾經喺1月31日發通告,承認跟銀行商討融資,亦可能提出私有化,豈料大市喺2月初開始急跌,公司喺2月9日又再發通告,指因為股票及債券市場動盪,大股東已無意再與銀行商討私有化融資,流傳兩星期唔夠嘅私有化計劃正式告吹;而瑞房股價則逆大市而行,喺港股從低位連日反彈之際,股價卻從傳出私有化後的高位2.7元水平,急急回落至最低2.1元水平,昨日股價則收報2.18元,較傳出私有化時下跌兩成。

執行慢決策差

查實瑞房上月底傳出私有化之際,股價走勢已相當奇怪,於1月29日江湖傳聞私有化,當日股價卻紋風不動,未見任何春江鴨偷步入場。待公司於1月31日發通告確認姑爺有意「班水」搞私有化,股價當日即急升至2.7元水平,其後又幾近打回原形至2.3元水平,直至2月9日未發通告否定私有化之前,當日股價又急升至2.7元之上,其後回落至2.58元收市,至收市後再見通告,周一股價即裂口低開,不足10個交易日股價變幻無定,難怪有口痕友話姑爺變心快過打針,股東好易唔見金。

自瑞房2006年10月以每股5.35元招股價上市以嚟,股價表現最叻亦不過係金融海嘯前的9.87元,股東高位未有及時分手,海嘯後股價最低見1.03元,至噚日收市2.18元計,上市持有至今,唔計收息賬面蝕超過五成,都咪話唔肉赤。瑞房股價表現不濟,市場歸咎公司執行力不足、決策力不濟。

落後股中嘅XO

股價表現除咗反映公司基本因素之外,亦體現投資者對其管理層嘅信心,即使舊年內房股炒到甩轆,由龍頭炒到龍尾乜嘢內房都升至少五成甚至以倍數計算,但姑爺旗下嘅瑞房一直無嚟精神,自2016年內地樓市政策放寬至去年底再收緊,其間瑞房股價累升唔夠三成。瑞房難獲投資者青睞,市場普遍相信係因為集團僅集中進行開發周期長、資金回籠慢嘅舊改項目,而唔做周轉期快嘅項目,令資金長期積壓,更在海嘯期間傳出破產,姑爺撲水打救,瑞房先至死過翻生。

不過瑞房並未有汲取教訓,繼續其慢過蝸牛嘅方針,期間更不斷將各地值錢嘅資產變賣,令其具質素嘅資產買少見少,今次欲提私有化又喺不足兩星期內告吹,更令投資者失望,見財化水,又再逃生無門,難怪有股東謔稱它是「落後股中嘅XO」。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads