2018年2月15日
年三十港股有半日市,恒指相信會在超過三萬點水平收爐。新一年開始,三萬點已經變成常態,再唔係高不可攀嘅高位,隨時變成唔可以跌穿嘅心理關口。唔好睇少,以前二萬點都曾經係高位,而家跌穿二萬直情係股災,穿一萬更加係被視為冇可能。道指二萬點過往是要開香檳慶祝嘅關口,而家二萬點係恒常化,上望三萬。只有日本股市先會由四萬點嘅高位跌落嚟一萬幾千點,長期一蹶不振,代表這個國家嘅企業任你汰弱留強,都不能重拾昔日風光。香港嘅好處係,當香港嘅本土企業例如國泰(00293)唔爭氣,還有中國企業如騰訊(00700)取而代之。香港由一個城市嘅股票市場,變成未來世界第一大經濟體嘅股票市場,恒生指數有乜法子唔係穩步上升?
16日(周五)就正式踏入戊戌年,戊戌年最出名係120年前嘅戊戌變法,即係你聽過嘅譚嗣同等在街市斬首,「去留肝膽兩崑崙」嘅一年。政治上而家香港就同當年嘅戊戌年一樣,有一個女嘅話事,邊個唔妥嘅都冇運行,只係這個話事嘅本身其實都係光緒,背後有人真正話事。戊戌年是否清朝最後機會翻身嘅一年?還是變法成功都唔可以改變清朝沒落嘅結果?留待歷史學生研究。
但我肯定香港而家呢個戊戌年,係你致富嘅關鍵一年,係改變你身家嘅最好(若非最後)機會。股票、樓、做生意、加密貨幣,今年係所有致富工具最齊備最大上落嘅一年,睇中或者睇錯,身家一係翻幾番,一係唔見一半。丁酉年係逼你發達,你瞇埋眼求其買一樣資產都可以令你有所增長,戊戌年如果你瞇埋眼買錯,後果就和譚嗣同一樣。
唔容易,所以年三十,盡情同屋企人開開心心,你有一整年要煩。祝大家新年進步。
放大圖片 / 顯示原圖
訂戶登入
下一篇: | 投資健康是更大的財富 |
上一篇: | 「滬港通」及「深港通」周三收市統計 |