2018年2月14日
仲有兩日就是大年初一,每年呢段時間,脂肪、膽固醇同體重就急速增長,皆因唔少公司都會喺呢段時間搞團年飯或周年聚餐,單係出席相關活動,阿Man都食滯同埋有啲攰。不過其中一間公司嘅團年飯,每年都係阿Man最期待嘅,就係肥仔老友嘅鴻鵬資本搞嘅團年飯。曾經作為呢間公司嘅一分子,阿Man最高興係睇見老友公司茁壯成長,而聚會上亦跟唔少新知舊友聚首一堂,就算幾忙都好,阿Man都一定安排出席。今年鴻鵬資本嘅團年飯,除咗一班熟悉嘅舊面孔,仲多咗好多上市公司老闆,同埋財金界猛人出席,反映鴻鵬資本係本地薑金融機構嘅江湖地位持續提升。
躍升為鴻鵬大股東
作為一間本地薑金融機構,能夠得到咁多財金界猛人出席畀面派對,除咗係鴻鵬本身實力愈見雄厚之外,引入中資猛料股東,更令公司如虎添翼。阿Man講緊嘅中資猛料股東,正正係去年鴻鵬資本注入英裘控股(01468)時,認購咗約16%股權嘅京基太子MC。京基集團除咗係內地具實力嘅內房企業之外,MC本身亦活躍於資本市場,尤其精於投資媒體及資訊科技項目。最為人所熟悉嘅當然係作為美圖(01357)前期投資者,目前更加係美圖嘅主要股東之一,持有11.18%美圖股份。
其實早於去年MC大手買入美圖股份一役,已經見鴻鵬資本手影,整項交易亦係透過鴻鵬進行,當時已知雙方關係非比尋常。直至去年英裘出售控股股權,隨後注入鴻鵬資本,以及MC跟肥仔(鴻鵬資本始創人)雙雙入股英裘,關係亦正式曝光。尋日英裘控股出咗份要約通告,由MC全資擁有嘅美思環球,向英裘原大股東以每股0.255元收購約16%股份,並向其他股東以同等價錢提出G.O.(General Offer,全面收購)。完成交易後,MC將會成為英裘最大股東,持股量約31.5%,而原殼主則持有約2.1%股權,而肥仔則持有約16.1%股權。無論其他股東接受要約與否,交易完成後,意味住MC正式入主英裘,同時亦成為鴻鵬大股東,英裘將變身為金融機構,改朝換代正式開始。
聽聞MC成為鴻鵬大股東後,原有團隊將繼續為其効力,公司迅速成長,證明團隊屬業內精英,而肥仔更加係公司靈魂人物,透過其對資本市場豐富經驗及擴闊嘅人際網絡,鴻鵬資本已成為本地薑金融機構嘅中流砥柱之一。可能對金融圈外人,鴻鵬呢個名字有啲陌生,但若然係圈內活躍分子,唔識呢間公司都好打有限。鴻鵬由2011年成立至今,不足10年時間,由最初主要為高資產淨值專業投資者服務,進化至主要服務對象為上市公司,並積極參與資本市場項目。
自2013年起集團參與嘅資本項目,當中有擔當包銷商、亦有擔任聯席牽頭經辦人,更有唔少擔任獨家賬簿管理人,無論係placement或者IPO項目,都有豐富經驗同實力,MC入股後,當然放心由原有班底繼續為其効力。
麥狄文(徐狄怡.證監會持牌人)
訂戶登入
下一篇: | 資金部署捕捉節後升勢 |
上一篇: | 謙虛地向下一代學習 |