2018年2月12日
金正恩妹妹金與正參加冬奧開幕,仰首微笑,傲視眾人。外交大使幾時都係由女士出任有着數,無論幾惡嘅男人都要喺鏡頭前畀面你,鏡頭後如何就冇人知。北韓可以變成冬奧嘅焦點,全憑金與正同啦啦隊,可惜電視冇機會讓大家真正見識。
過年前市場冇錢,要股市能夠收復失地反彈上去甚難,惟有寄望過年後,美國股市跌定,香港可以重新再上。反之,如果過年期間美股大跌,大吉利是講句,過年後香港開市隨時股災都有份。今個星期點都會有啲反彈,因為淡倉都要平倉過年。最好過年前減倉,否則年初一睇到美股唔對路,怕你不快嘅情緒要帶到初五,咁嘅開年方法大家都唔想。
已不再受人尊重
近日最流行嘅討論係香港進入了沒有專家的年代,冇人相信專家。藝人私下講幾句流感疫苗,在網上傳開後連醫生都要走出來解畫,最慘係醫生反而係冇人信嘅一方,而唔係藝人。香港本來係專業人士當道,唔單止令好多香港人脫貧,更加係香港同內地分別嘅一大特色,香港專業人士真正有專業水平,令人安心。但係先有一個專業人士特首搞到香港天翻地覆,最近再有一個僭建法律專家唔知自己屋企有僭建,專業人士已經沒有以往受人尊重,專業人士先係最會呃你嘅一群。
唔怪得專業人士,只係市民學乖了,加上互聯網搵資料咁方便,每個人都可以係專家,個個都可以有自己見解。當喺電視機前面,個個專家都唔講人話,人人都為自己飯碗說話呃人,再信專家你就自尋死路。法律專家成為政治打手,建築專家屋企起多個地牢,會計專家話水浸嘅政府要開徵新稅,你仲覺得專業人士會為你改善生活?香港冇晒專業嘅專業人士,在冇錢冇人冇關係嘅環境下,只係剩番個可以上市集資嘅股票市場,同埋長升長有嘅樓市。你唔係靠股票、靠樓市搵食,諗唔到仲可以點生存。
放大圖片 / 顯示原圖
訂戶登入
下一篇: | 一晚輸掉400萬美元 |
上一篇: | 「滬港通」及「深港通」上周收市統計 |