《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年1月31日
去年比特幣喪升，令唔少本來唔留意虛擬貨幣嘅投資者，亦開始忍唔住加入炒賣虛擬貨幣行列。除咗炒賣虛擬貨幣之外，喺大行其道下，愈來愈多人發展副業，以挖掘虛擬貨幣賺取外快。今年更開始有虛擬貨幣期貨交易，而代幣發行（ICO）愈嚟愈普遍。
雖然好多國家仍未出手管制虛擬貨幣交易，但南韓早於去年底已率先干預，禁止匿名交易虛擬貨幣，並打擊利用這類貨幣洗錢嘅活動。理由係虛擬貨幣交易正持續以非理性方式過度升溫，隨着加密貨幣泡沫化嘅憂慮升溫，南韓政府不得不重手打擊有關炒賣。
多個政府已出手干預
除咗南韓政府，中國、美國同日本政府，自去年開始亦陸續展開針對虛擬貨幣交易平台及業者嘅銀行賬戶進行管制，以防止虛擬貨幣淪為不法之徒洗黑錢嘅工具。其實美國財政部長亦曾呼籲，G20應加強合作，防範比特幣等加密貨幣，變成好似瑞士銀行業嘅秘密賬戶一樣，淪為壞人做壞事的工具。
至於香港方面，證監會亦終於出手，已去信警告數間交易所，要求具期貨及證券特色嘅虛擬貨幣下架，而且唔排除有進一步行動。至於點樣落實監管，政府暫時未有定案，只係會同國際執法組織保持溝通。
其實目前已發行嘅虛擬貨幣高達1400種，去年集資額更高達40億至70億美元，雖然以全球資本市場嚟計，呢個規模並唔構成金融系統性風險，不過對於個人投資者嚟講，呢類資產風險相當高，參與投資真係要思前想後，了解多啲。
現時網上資訊泛濫，唔少人從網上資訊見到舊年個個買虛擬貨幣嘅回報以倍數計算，仲要有唔少挖礦機廣告，以及投資KOL對投資虛擬貨幣及挖礦進行宣傳，向網友展示其驕人戰績，難免令想搵快錢嘅年輕人覺得心動。阿Man就一向對自己唔熟悉嘅投資產品敬而遠之，對虛擬貨幣嘅認知更加少之又少，所以從未涉獵呢個投資領域。當然阻人發達猶如殺人父母，阿Man當然唔敢叫人唔好玩虛擬貨幣。不過用最簡單嘅道理去睇，虛擬貨幣當中嘅王者比特幣，可以一年之內升值10倍，一旦崩盤亦可以極速跌九成。既然多國政府已出手監管，當然係意識到當中風險。要從虛擬貨幣當中圖利，亦要注意可承受風險，至於開礦挖幣，喺愈來愈多人參與之下，想圖利就變得難上加難。阿Man認為虛擬貨幣發展至今，呢期最賺錢應該係一批挖礦機供應商。
麥狄文（徐狄怡．證監會持牌人）
放大圖片 / 顯示原圖
訂戶登入
