熱門:

2018年1月29日

方卓如 方如玉帥

眼光望遠啲先可自保

星期六、日參加環球帆船賽嘅6隻船响維港比賽,呢啲世界級嘅賽事在香港無聲無息,除咗係帆船唔算熱門運動之外,賽事背景沒有事前足夠解說,令到唔係咁多人明白什麼一回事,反而帆船入香港嘅時候撞沉咗隻漁船就最多人知。遠洋比賽係最辛苦嘅運動,其他陸地賽事,有什麼事你可以全身而退。唯獨是在海中心,有什麼事,只可以捱到埋岸。我只係試過30小時從日本帆船賽至台灣,已經辛苦過毅行者百倍。

周庭被取消參選資格,受害嘅係全香港人。過去兩年香港嘅自由程度急速下降,原因係年輕人一腔熱血諗到乜就講乜之後,繼而再用自己嘅方法行動,自己付出代價之餘,其他香港人都一齊埋單。長毛過去一直宣誓加料都仲可以做議員,以後怕且永遠無得參選。過往可以容忍嘅言行,例如羅冠聰能夠做議員,而家周庭連選都唔得。最慘係,過去3年,香港人嘅反抗意志被透支乾了,麻木到而家,精神上完全陣亡,才有咁多侮辱人類智慧嘅說話出現,令到僭建嘅人夠膽走出嚟大大聲話唔同意自己冇誠信。

唔可以怪年輕人。成年人道德敗壞,鬼話連篇,如果年輕人唔熱血反抗,呢個社會係冇希望。可惜年輕人熱血之後,沒有熱血成年人出手善後,卻有無數冷血成年人撲出收拾邀功,進一步玩殘社會,讓自己扶搖直上。正如《沙漠梟雄》入面Prince Feisal所講,「Young men make wars, then old men make the peace」。年輕人冇打勝仗,成年人唔想和平,全香港輸晒。

以後純粹股票樓市,因為社會已經唔到你話事,再講就變維園阿伯。股票唔好再去學睇業績,要睇國際大勢,否則你俾人呃咗都唔知咩事。點解美國又加息又收水,美金反而會跌?加息股市又升?以前唔係話加息會推冧股市?如果加息推唔冧股市,是否一樣推唔冧樓市?如果屬實,咁多人叫你加息在即唔好買樓,你聽唔聽?

要留意,唔只股市升,油價都升。代表印咗咁多年銀紙,預期中嘅通脹可能終於來臨。點解美國咁肯加息?可能係預期通脹加快,預早加息減慢通脹速度。聰明人恐怕通脹殺到埋身,買股票,沽美金,其實係作好準備。港紙跟隨美元下跌,人民幣愈升愈有,香港嘅資產價格唔單止唔會跌,相反仲會被買到爆上。唔好俾美國收水呃到你,美國話減少買債所謂收水,美國貨幣供應量M2响2017年都增加了4%。美國銀紙又印多咗,國債又借多咗,唔通你認為使錢使慣咗嘅美國突然間會節儉?

保護自己財富係每個人嘅責任,全球一半財富由1%人擁有,佢哋乾坤大挪移嘅本事只會愈嚟愈勁,眼光要望得遠啲先可以自保,仲學人睇本年報就輸鬼死你。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads