2018年1月11日

麥狄文 金融街密語

資金傾斜 股仔缺水

自去年中發生「粉塵爆炸」事件，「謎網50」股份一直冇好日子過，當中5隻股份被勒令停牌，包括最先被DQ嘅隆成金融（01225），接住10月到新銳醫藥（06108），至上月證監DQ行動升級，兩個交易日內，一口氣DQ 3隻謎網股，包括華仁醫療（00648）、第一信用（08215），以及大夫嘅上市旗艦康健國際（03886）。其後康宏環球（01019）前管理層更被廉署拘捕，康宏反客為主，入稟法院向28名市場人士展開法律行動，追討公司損失。

去到前日又有新消息，康宏環球自願發通告提出，提醒投資者、經紀要提高警覺，唔好「對該等股份進行交易」，因為公司喺2015年曾進行「不當配發股份」。上市公司叫人唔好買自己嘅股票，呢種通告阿Man喺股場打滾咁多年都係第一次見。

可能大家有啲奇怪，反正康宏停咗牌，基本上已無法喺市場買賣，康宏出通告提醒人咪買佢隻股，會唔會有啲多此一舉。其實康宏出通告絕對有用，皆因股份雖然已停牌，一般缸邊友當然唔可以進行買賣，但其實喺市場上，仍有其他途徑進行交易，而最常見就係我哋經常講嘅OTC（Over-the-counter），即係場外交易。康宏出通告，主要係提醒行內人士，萬一有人拎住康宏嘅貨求售，都要識講唔好。

近期股市成交持續暢旺，日日過千億元，但只限於大價股同中價股有成交，睇番啲細價股只係炒個別，大部分股仔成交仍然淡靜。即使個別股仔偶有炒作，打入升幅榜，成交金額亦不過一千幾百萬，始終唔成氣候，資金仍然傾斜只買大價股。

自從「謎網50」出事之後，證監會對相關股份嘅戶口買賣進行調查，除咗調查戶口持有人身份之外，仲有資金來源，尤其係有借貸嘅孖展戶口，證監更加係打爛沙盆問到篤，向有借孖展畀相關股份嘅證券行窮追猛打。為免被證監問長問短，家吓好多證券行都唔肯借孖展畀呢批股仔，而之前已借落嘅，亦不停追孖展，甚至要求持有「謎網50」股份嘅戶口沽貨，或轉走批貨，免得再成為證監查問對象。

謎網50波及 股票借貸趨緊

至於持有較多股份嘅主要股東，因為喺證券行借唔到孖展，索性成批貨拎出嚟做抵押，希望借得幾多得幾多。呢期阿Man收到唔少有關股票抵押嘅查問，有意抵押嘅股份，基本上喺「謎網50」清單上就冇得傾，而其他欲借錢周轉嘅股份，大多數都係四五六七線嘅股仔，當然呢啲股份想借錢，LTV（貸款價值比）一定唔會高，而且貸款期亦唔長，息口就當然貴啦。

喺過往市場對股仔放水較為寬鬆嘅時候，貨主肯付出年息15厘或以上，通常都有辦法搞得掂。但今時唔同往日，而家啲金主為求自保，一般股票抵押通常免問，創業板更加無得傾，只會考慮主板股份，仲會要求能夠畀到控股權數量嘅股份，再按殼價兼且較低LTV先有機會。

舉個例子，一隻主板股嘅控股股東，能夠拎到超過55%股份作抵押，以主板殼價六七億元計算，頂多都係借到1.2億至1.5億，至於息口幾多，就要睇番公司NAV同埋流通量，但以年息計，無15厘都好難有金主肯借。

過往股票借貸喺市場屬等閒事，但自從證監向「謎網50」出招之後，相關交易幾乎絕跡，所以股仔極度缺水，咪以為今年港股牛市繼續，行到牛三嘅瘋牛階段，市場會一如過往，出現雞犬皆升、百花齊放嘅景象，可見「謎網50」對股仔嘅影響，相對2015年股仔大時代後爆煲更嚴重。

麥狄文（徐狄怡．證監會持牌人）

 

下一篇：	獨角獸投資新機遇
上一篇：	中生製藥新藥堪憧憬 短期勿高追