熱門:

2017年12月1日

方卓如 方如玉帥

起來 不願做奴隸的會計師

你如何知道自己老咗?就係你做上年相同嘅事,感覺好似昨天一樣,你就係老咗。如果你做番幾年前做過嘅事,感覺又如同昨天一樣,咁你就係老咗好多。

會計師公會一年一度選理事,對社會嚟講小事一樁,對會計師嚟講亦唔見得係什麼大事,只係今年與往年唔太一樣,先值得本欄撇開比特幣、實名制、大市調整、樓市新高等等重大社會議題而稍事客觀分析評論。

報載今年有20人爭7個位,近年嚟最熱鬧。十幾年前,可以有26人選,之後又試過得8個人選。無論26個還是8個,通常呢啲唔關大棚福利嘅活動,好冷清,邊個會選中係毫無懸念。

今年唔同,報載係兩派大戰,素人要改革傳統,挾着去年曾經在選委會選舉斬殺傳統勢力嘅往績,強勢闖關。

根據十幾年嘅觀察,親身入投票站自由投票同理事會呢啲寫字樓遙控投票,唔可以直接比較。兩者皆贏嘅,係少數。如果掉以輕心以為贏梗,係大錯。

不過今年嘅素人要改革嘅事情好清晰,例如一人一票選會長。6年前曾經有人提出過,當年隱形金主都有留意,恍如昨日。今次素人更加具體,實行選舉人制,會員先投票揀選會長,由理事會根據結果投票確認,想出這毋須修例的方法,那位素人,簡直天才兒童。

又例如公會派息回水,唔好坐擁4億現金封塵,絕大部分會員舉腳贊成。公會每年收入穩定,絕對夠開支,坐擁巨額現金,如果係上市公司,隨時停牌。公會有太多現金,會員其實受害。點解?公會有咁多錢同會員打官司,哪有會員敢同公會據理力爭?就算道理在會員那邊,有巨大資源嘅公會,可以打官司打到你破產,你未贏得道理,已經輸掉身家。

太多錢,就算公會都會身痕。如果用你一兩億,做一啲大白象項目,明益自己人,你驚唔驚?魔鬼在細節,你係會計師,識睇年報,睇睇公會嘅年報,尤其是註錄,高鐵式使晒你啲錢,將錢袋入自己firm,你仲唔明?你仲天真到教佢點樣善用資源?

至於高層去留問題,只想講,如果係維護會員利益嘅人,使幾多錢都要留。如果有人立心不良,想害會員嘅,公道自在人心。有幾多人對公會敢怒不敢言,只係私底下深深不忿,認為公會處事唔公道,呢股怨氣近年愈來愈強。有人可以私底下改動和解協議,當向理事會投訴,會長可以當睇唔到唔去處理,讓人有包庇護短嘅感覺。難怪會員要求一人一票選會長,又要求高層換人。

我冇得投票,但如果你係會計師,今年請投冒着被秋後算賬抄家風險嘅素人,投佢哋,畀條生路自己。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads