熱門:

2017年8月23日

麥狄文 金融街密語

改革風險成本不應由投資者埋單

港股今年表現氣勢如虹,由年初至今連升7個月,恒指喺月初見過27876點,跟2015年高位28500點水平只有一步之距,但相對成交額就差得遠,令港交所(00388)股價表現遠遠落後,今年高位不過230.65元,跟2015年高位298.65元,足足相差68元。

同股不同權或糖衣毒藥

港交所上半年新股集資額亦跌出全球三大,小加同志急於為股東創造更大利益,準備推出「創新板」,希望吸引更多公司嚟香港上市,有關諮詢早已喺兩個月前展開。早於兩個月前,阿Man曾就呢個創新板畀過意見,擔心創新板變成另一個老千平台。其實講嚟講去,都係點樣改革上市平台都冇問題,重點係投資者權益如何得到最佳保障。

今次推創新板重點係允許未有盈利公司同埋「同股不同權」公司來港上市。市場上對於前者爭議唔大,因為目前創業板唔少公司都係屬於呢一類,投資者對呢類公司唔會太陌生。

至於「同股不同權」,上次提過藥明生物(02269)喺控股公司層面,暗渡陳倉自製「同股不同權」,變相靜靜地起革命。

對於允許「同股不同權」公司來港上市,主要係港交所對於錯失阿里巴巴呢舊肥豬肉仍耿耿於懷。目前,阿里巴巴市值超過3萬億港元,目前香港上市公司僅騰訊(00700)能與之匹敵。阿里巴巴原屬意掛牌港交所,奈何港交所當時堅持對「同股不同權」不作讓步,馬雲最終情歸紐交所。阿Man唔明係港交所當日嘅堅持,何解會變成今日小加同志口中所講「『同股不同權』並非香港核心價值」。「同股不同權」或者可以為港交所股東帶嚟收益,但對其他投資者可能係糖衣毒藥。

港無集體訴訟權

紐交所可以允許同股不同權公司上市,但同樣能夠保護投資者利益,主要係美國嘅投資者、小股東鬆散嘅股權,遇到大股東不公平對待嘅時候,可以透過集體訴訟權(Class Action)捍衞自身權益。不過好對唔住,暫時香港係未有集體訴訟制,一旦有上市公司進行不投票權架構(WVR),屆時大股東或管理層可能持有一股實際上有兩股甚至更多股數嘅投票權,遇到上市公司決策令投資者權益受損時,其他股東亦只有硬食,完全係有冤無路訴。

不過,首份諮詢較為平易近人,特別強調兩點:第一係畀第二上市公司採取同股不同權;第二係撤銷第二上市公司業務必定不可喺大中華地區嘅限制。第一點有助保障投資者權益,即係若然喺香港只係第二上市,當小股東權益受損,仍可以去番第一上市地,如美國以集體訴訟方式控告公司以保障其權益。第二點似乎係針對好似阿里、百度等喺美國作為第一上市嘅中資科網巨企鋪路,盡快引入呢類公司嚟香港上市,制度上稍作調整,甚至可吸引Google、Facebook嚟香港第二上市,亦有助活化第二上市交投。

無論最終創新板成立,又或者主板及創業板改革都好,希望港交所唔好為咗自身股東利益,而犧牲其他股民及投資者利益。雖然話任何改革都有風險同成本,但無理由港交所食大茶飯嘅主觀願望,要由投資者嚟埋單。港交所嘅道德風險問題,最終消耗嘅將會係香港法制同誠信,所付出嘅代價可能遠比收益大。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads