熱門:

2017年7月12日

麥狄文 金融街密語

萬達送融創一程似撤資

呢兩日除咗個大市回勇勁升之外,最吸睛嘅財經新聞,一定係最鍾意濕平嘅融創中國(01918),主席孫宏斌大玩蛇吞象,融創以631.7億元人仔(約739億港元),向萬達收購13個萬達文旅城及76個萬達酒店項目。大家嘅焦點係只有區區近600億市值嘅融創,邊度嚟咁大筆資金完成交易呢?較早前融創先扮演白武士,入主債務纏身嘅樂視,家陣又要使超過700億買萬達資產,唔通有錢就身痕?不過,孫宏斌話今次收購完全來自融創自有資金,皆因上半年公司賬上仍有超過900億「茄殊」,原來有錢就任性至真。

今次萬達向融創出售資產,王健林肯定笑到瞓唔着,皆因萬達喺好耐之前已經有意出售酒店業務,打包出售萬達城,只係撈番管理一瓣,只不過當時市場反應麻麻,若然唔係都唔使私有化啦。

至於今次交易,項目將維持用番「萬達文化旅遊城」品牌,並繼續由萬達規劃、營運等,酒店管理將繼續至完約,雙方又同意喺電影等多個領域全面戰略合作。今次融創出價進取,遠遠高過之前王健林想甩手個價,順手賣埋酒店資產,完全係賣豬肉搭埋舊豬骨,皆因酒店項目喺2015年仍然錄得虧損。

提供「二按」助上路

融創接咗呢舊豬肉加豬骨,市場本來唔睇好,擔心融創負債水平過高,關心緊今次收購嘅融資點搞。至噚日融創復牌出通告,收購代價以內部資源及通過銀行融資撥付,其中296億元人仔以萬達商業通過向指定銀行向集團發放貸款支付,期限3年,利率為銀行3年期貸款基準利率。咁即係萬達放數畀融創支付一半交易代價。家陣萬達願意度水畀融創完成交易,融創股價噚日復牌後反而勁升13.6%,就好似萬達放畀融創條數唔使還咁款。

睇睇呢個條款,真係似曾相識,咪就係近日本地發展商向買家提供二按,表面上就係幫啲唔夠首期嘅買家上車,說穿了係買家額外畀多啲利息發展商。計計條數等於樓價畀多大約兩成,發展商借埋錢送買家上路做樓奴,而得着當然係額外利息收入同成功散貨。

其實,早喺今年初,融創未計入股樂視影響,負債率已急升至逾200%水平,只不過集團近年合約銷售額創新高,負面消息先慢慢淡化。至於樂視燒錢速度之快,一直令市場憂慮融創有否需要「再泵水」,家陣整單蛇吞象,阿Man對融創睇法就較為保守,股價急升唔排除係挾淡倉,之後孭住咁大條數,若然銷售成績維持唔到,都咪話唔牙煙。

反觀王健林就醒得多,連同今次交易,萬達幾乎將所有喺內地產生負債嘅「重」資產沽清,無債一身輕,變身商業服務管理營運商。不過,唔代表萬達從此變成輕資產公司,皆因其海外投資額已累計達2541億元,即係萬達只係從祖國撤資,進軍世界啫。

放眼世界或惹批評

同樣係首富,王健林同超人都有遠見,喺業務基地發展成熟後,再進軍世界,只不過香港係彈丸之地,生意做幾大都好,市場較細易飽和,超人放眼世界好正常;但係中國地大物博,十幾億人口嘅市場,市場飽和談何容易?王健林喺呢個時候嚟招資金大挪移,難免令人覺得佢似撤資,將資金搬離祖國,多過放眼世界,一個唔小心,好容易畀人唔夠愛國嘅感覺。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads