熱門:

2017年5月10日

麥狄文 金融街密語

RO吃香 專業人士撈過界

香港樓價已去到瘋狂地步,面對再辣嘅辣招,內地資金視若無睹,掃貨一啲唔手軟,就連本地發展商喺投地方面出手出價亦望塵莫及,對住內地發展商只能望其項背,可見本港經濟最重要命脈──地產發展,早已由大陸人主宰。

其實除咗地產發展漸漸由內地資金話事,另一主要經濟命脈金融業,似乎亦逐步由大陸人主導。單睇呢幾年嘅上市公司併購,又或者係買賣殼嘅case,十居其九都係大陸老闆,就算公司易手後管理層係香港人,背後金主都係內地人。正因為愈嚟愈多deal由大陸人主導,唔少大陸金主發覺畀財金顧問嘅使費都唔少,而唔少金主買殼好似上癮咁款,買完一隻又一隻,與其要逐單刁畀錢人賺,不如買埋間金融機構,為此等財金活動提供服務畀番自己,肥水不流別人田。

睇番今年初至今,短短4個月,根據港交所(00388)資料顯示,已有超過20間新證券行開業,扭轉之前兩年證券行減少嘅跌勢。除咗新開業嘅證券行,呢兩年資產管理牌照(俗稱9仔牌)嘅增速亦相當驚人,單係舊年證監會就新批出172張9仔牌,而2015年為104張。除咗一般證券交易嘅1號牌、資產管理嘅9號牌,可以提供機構融資嘅6號牌更為吃香,因為可以擔任埋上市保薦人工作。有齊1、6、9號牌嘅金融機構,可以真真正正喺市場提供一條龍服務。

當然大陸金主大把水,要搞一間金融機構,喺資金方面絕對唔成問題,不過有錢就是任性,為咗慳番申請牌照嘅時間(一般需時六至九個月),唔少金主寧願買牌,只需要辦理持牌公司股份轉讓手續(通常需時三至六個月),所以「啤牌」應運而生。阿Man之前亦喺本欄講過有關「啤牌」嘅故仔,update一下集齊1、4、6、9牌嘅金融機構,最新叫價已經去到3000萬,一年間叫價已近翻一番,都咪話唔誇張。

不用落手落腳都月入5萬

由於每個受證監會規管嘅牌照,至少需要兩個負責人員(RO)作為持牌人,目前市面上1牌RO數目唔缺,唔少老行尊都持有1仔牌,即使近年新增證券行數目唔少,業界人手亦應付到。但係資產管理係近10年才興起,加上新批9仔牌嘅數目增速,可以想像到9仔RO有幾渴市,一個只係持牌唔需要落手落腳做嘢嘅9仔RO,閒閒地人工都5萬一個月;若然經驗豐富,可以睇住個檔口,做埋行政管理工作嘅9仔RO,叫價已去到7至8萬一個月。至於對行業知識跟專業資格要求更高嘅6仔RO,鮮有齋掛牌嘅人頭,因為喺機構融資呢個範疇,稍有差池好易踩中地雷。不過愈嚟愈多專業人士,尤其係畢業冇耐而又有執業資格嘅律師同會計師,唔做本業而走去做機構融資,因為呢瓣業務確係需要會計同法律知識,一個新仔只要累積夠3年經驗,公司又肯幫手上埋個RO牌,每個月已穩袋6位數字薪金,仲邊使一日做十幾廿粒鐘先獲得同等待遇,難怪咁多會計同法律界專才撈過界。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads