熱門:

2017年4月26日

麥狄文 金融街密語

豐盛虛高市值趕唔切實化

繼輝山乳業(06863)畀沽空機構篤爆之後,噚日又到沽空機構Glaucus狙擊豐盛控股(00607),結果豐盛半場未夠就玩停賽,停賽前跌咗11.8%。Glaucus對豐盛嘅指控都幾狠,唔單止話佢嘅股價擺到明係大操控,仲預期豐盛股價要插七八成,情況好似輝山乳業、市值蒸發九成嘅德普科技(03823),同埋停牌接近兩年嘅漢能(00566)。若然Glaucus冇估錯,咁豐盛真係手尾長。

Glaucus踩到豐盛咁盡,係因為從豐盛控股每日嘅交易模式推斷,股份價格被操縱,內部人士透過股價上升,將所得利益秘密地轉移大部分有價值嘅資產至豐盛控股主席季昌群及其家族手中。報告又話,豐盛控股本來係一間商業及住宅物業發展商,但呢部分業務相對其市值細過粒豆。

2016財政年度,公司嚟自經常性業務嘅EBIT只有1.32億元人民幣,意味以經營性營運溢利計算估值高達431倍,呢個估值水平屬於「荒唐可笑」,股價插水係必然嘅事。

市值33個月飆230倍

要評估豐盛係咪如Glaucus報告所指咁大劑,不如回帶睇吓呢間幾百億市值嘅公司係如何煉成。豐盛控股前身係滙多利集團,主業為生產家居電器用品,2007年5月14日於開市前遭證監會勒令停牌。至2008年,財技高手簡志堅以350萬港元向原大股東楊渠旺收購36.03%總發行股數,成為控股股東,之後股份因為債務問題,一直未能復牌。

其後滙多利宣布1股供4股,供股價為0.05港元,集資約8000萬港元,由季昌群嘅公司Magnolia Wealth負責包銷,因包銷公開發售不足額,季昌群成為公司大股東,佔股52.28%,簡志堅股權則由36.03%攤薄至7.21%。

滙多利成功發行可換股債券後,集資5億收購季昌群南京豐盛控股旗下的公司,其擁有包括在鹽城及重慶市處於不同開發階段的5個項目。反向收購成功後,公司喺2013年12月成功復牌,當時公司已發行股份為21.1億股(不包括可換股債券),市值約3.2億港元。接着公司多次集資跟收購注資,目前持有上市公司股份包括實力建業(00519)26.82%、衍生集團(06893)22.93%、建發國際(01908)9.35%、中生聯合(03332)16.67%、自動系統(00771)39.59%、密迪斯肌(08307)16.65%,以及作為大股東持有高速傳動(00658)73.91%股權。

經過一連串動作後,從復牌到現在,豐盛喺33個月內市值升幅最高達230倍,至740億港元,驚人增幅連股王騰訊(00700)都要行埋一邊。

其實幫助豐盛復牌變身嘅季昌群來頭唔嘢小,除咗係南京豐盛產業控股集團董事兼主席(南京豐盛係中國民企500強之一),亦是南京市人大代表,出任很多其他公職。豐盛第二大股東華融,係目前中國資產規模最大嘅國有金融資產管理公司之一。不過公司背景再強都好,虛高估值遲早有日爆煲。至於阻止爆煲嘅其中一招,就係盡快加印股票嚟收購實業,實化虛高估值,豐盛收購高速傳動正正係呢個原因。

只不過喺實化虛高估值嘅過程中,不得不與時間競賽,要喺股份進入沽空名單前完成呢個動作,只可惜係豐盛市值膨脹得過快,而實化估值過程則完全跟唔上進度,沽空機構自然有機可乘。

麥狄文(徐狄怡,證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads